الاثنين، 26 يناير 2009

ابو الفوارس


النهارده انا هاكلمكوا عن شخصيه ثريه جدا فى حياتى ، شخصيه تقريبا سابت اثر فى كل اللى اتعامل معاها باختلاف نوع الاثر ده .... زى ما انتو عارفين كنت من كام يوم مع نادر و امير فى وسط البلد و قالولى انت ازاى لحد دلوقتى ماكتبتش عن ابو الفوارس ( و طبعا مش ابو الفوارس عنتره انما ده الاسم الكودى لصاحبنا ده ) .. الحقيقه انى كنت مأجل موضوع الكتابه عن ابو الفوارس لانه ما ينفعش اكتب عنه كل حاجه فى بوست واحد ، ده محتاج بوستات زيه زى فناجيلى بالظبط ( مش فى الاخلاق و الطباع - انما فى انه مش من الناس اللى ينفع تكتب عنه كلمتين و تجرى تكتب على حاجه او على حد تانى ) .... كفايه مقدمات كده عشان ماتزهقوش و نخش فى الموضوع على طول
ابو الفوارس ده كان واحد من الناس القليله اللى انا دخلت الكليه و لقيتها فيها و اتخرجت منها و هو لسه و انا بادعيله انه ربنا يفك سجنه منها على خير ... كان اقدم منى بسنه ، لحق الثانويه العامه القديمه مش زى لحق التحسين .. اول ما دخل الكليه دخل قسم فيزيا هو و واحد زميلنا تانى ، بعد ما الاتنين سقطوا اول سنه حولوا على بيولوجى زميله و صاحب عمره الكليه بهدلته زى ما بهدلتنا بس اتخرج و ساب وراه ابو الفوارس ... انا عرفت حكايه ان ابو الفوارس ده كان ثانويه قديمه من ابن خالتى ( غتت و مابطيقهوش .. يا ساااااااااتر ) .. كان ابن خالتى جايلى يوم الكليه و شاف ابو الفوارس بالصدفه و اكتشفت ان الاتنين كان زمايل و اصحاب فى السعيديه و من هنا عرفت بدايه حكايه ابو الفوارس .... ابو الفوارس ده بصفته راجل كبير و فعلا لما كمل 29 سنه و هو فى الكليه خد وقف قيد فى الكليه و راح على الجيش بس خد تأجيل و رجع الكليه تانى و استحق انه يكون احد المعالم البارزة فى التاريخ السرى للكليه بتاعتنا اللى مايعرفهوش غير قله من اللى اتبهدلوا فيها ( زى العبد لله ) .. و مشكله ابو الفوارس و مشكلتى و ناس كتير جدا من الجروب بتاعى اننا من كتر ماقعدنا فى الكليه اصبح الدكاترة و المعيدين مايعرفوش يتنططوا علينا عشنا لحقنا ناس منهم وهما لسه طلبه زيهم زينا و الكبار منهم لحقناهم وهما لسه متخرجين فكنا واخدين وضعنا فى الكليه ... و طبعا بما ان ابو الفوارس واحد من اقدم الناس المواظبه على الحضور فى الكليه فكان ليه الحق انه يجى الكليه زى ماهو عايز ... ساعات كتير كان بيجى بشبشب و ساعات بالترنج بتاع البيت .. لدرجه انه فناجيلى كان دايما يقوله يا عم ابو الفوارس انت المفروض تيجى بعد كده بالجلابيه و ضارب عليها اللاسه التمام .. كان دايما فناجيلى يقولك ان ابو الفوارس بيفكره بمقاول الانفار ده غير تعليقات فناجيلى السافله اللى طالعه من دماغه اللى مليانه افلام سيكو سيكو و حاجات على تنوعيتها .. بس ده مش موضوعنا
ابو الفوارس كان 180 سم تقريبا او ازيد شويه .. هجمه .. عنده كرش عجيب .. كرش ناشف مش طرى زى كل الناس اللى بكرش ، يعنى ممكن لما تضربه فى كرشه ايدك ترد و دراعك يوجعك ( نادر على فكرة عنده عامل فى المصنع كرشه زى كده - و ماتفتكروش اننا بنحسس على بعض فى الكليه او فى الشغل انما ممكن تاخدوها على نفس المحمل اللى بيخللى البنات تدخل مع بعض الحمام مع اننا كأولاد مانقدرش نعمل حاجه زى كده عشان ما يتعملناش محضر فجر و فسوق و يقام علينا الحد ، و يقولوا بعد كده عايزين البنت زى الولد مع اننا محرومين من حاجات كتير ) ما علينا .... ايام الامتحانات كان ابو الفوارس ليه طبع غريب جدا .. طول السنه بيحضر و طبعا احنا حضورنا زى عدمه بنكون قاعدين فى السكشن او المدرج لمجرد ان الدكاترة تكون فرحانه بشكلنا و يحسوا انهم دكاترة بجد و عندهم طلبه مع ان الشهاده دى ماتفرقش معانا فى حاجه و انا كنت حالف انى لما استلم الشهادة الكرتون بتاعتى هاعلقها فوق القعده فى الحمام عشان ده اكتر مكان مناسب ليها بس انا لغايه دلوقتى لسه ماستلمتهاش .. المهم نرجع لابو الفوارس .. تلاقيه طول السنه سايبك و جايلك فى ليله الامتحان يقولك تعالى ذاكر معايا و لو ماقدرتش تروح تلاقيه بيقولك طيب اركز على ايه ، تقوله يا عم ده احنا لو فى تجارة ماينفعش تذاكر ليله الامتحان ، تسأله يا عم انت مذاكر ايه يقولك هاذاكر اللى انت تقولى عليه انه مهم و هيجى فى الامتحان بكرة ، يا عم هو انا اللى هاحط الامتحان ... و بعدين دايما كان يسألنا احنا مع اننا فى الهوا سوا و كلنا فشله زى بعض ، يعنى يا عم هانصحك تنجح ازاى و انا مش عارف اخرج من الكليه .. كنت دايما لما بيسألنى اقوله مثل مشهور أوى " كان ...... نفع نفسه " و طبعا ال ..... ده يبقى انا عشان مش عارف اخرج من الكليه و ابو الفوارس بيقولى اذاكر ايه ..... المهم فى يوم قلت يا واد يا عمرو اجبر بخاطره و روح ذاكر معاه اهو برضه تشجعه و تشجع نفسك .. و يا رتنى ما رحت ... عمنا ابو الفوارس ساكن فى الجيارة ... مجرد ما رحت انا و واحد صاحبى تانى قامت خناقه فى الشارع بالسنج و الجنازير و قزايز البيبسى المليانه بنزين و بيولعوا فيها فى منظر كان هيفرح المقدس مولوتوف لو كان شافه .. و الخناقه دى قعدت يجى ساعتين لغايه ما خلصت و احنا طبعا مش عارفين نذاكر و لا نفتح حاجه و الملحمه دى شغاله تحت ... شويه قلنا خلاص هنذاكر جه واحد صاحبه و سلم علينا و عزم علينا بحشيش ... يا عم شكرا عشان احنا عندنا امتحان بكرة ... ازاى و دى تيجى تكونوا ضيوف عندنا و ماتشربوش حاجه ( كانه بيعزم علينا بشاى و احنا اللى بنتغندر عليه ) .. يا سيدى لما نخلص امتحانات مسيرنا نيجى و نضرب كلنا سوا و هتكون ليله فل علينا كلنا ان شاء الله ... لا ما ينفعش .. و بعد ساعه من الشد و الجذب وافق انه يسبنا نذاكر ( عشان بس ماتقولوش انى باضيع وقتكم ) ... و قعد جنبنا فى الاوده يضرب خوابير و يشيش و الحق يتقال الصنف كان جامد لدرجه اننا اتسطلنا على الريحه و كان لو احنا ضربنا كان بقى ارحملنا من العذاب اللى احنا شفناه ..... طبعا مش هاقولكوا على نتيجه امتحان الماده اللى رحناها الصبح و هاسيب ده لتخيلكوا ... و من يومها عمرى ما رحت اذاكر مع ابو الفوارس تانى
و لسه فيه حكايات كتير عندى عن ابو الفوارس بس هاخليها للمرات الجايه ....... تشااااااو

هناك 37 تعليقًا:

حروف يقول...

يارب اكون اول تعليق بحجز وحرجع اقرا
سلام

Che يقول...

و ما زلت فى انتظار جودو يا ست حروف

سمكه واحده يقول...

شوف انا كنت لسه بقول ياهادي والله واقرا البوست ظروف قهريه خالتني اعلق قبل ما اقرا!
يعني انا دلوقت كنت منشرحه وهقري بقي لقيتهم بعيد عنك بيتفرجوا علي تمثليه بنت من الزمن ده وهي لسه بتقول ملعون ابو الفقر علي ابو الحوجه وكلام المثلثات ده واخد بالك انت ومسجمين اذ بي لقيت والدي العزيز بيهز في رجليه وبيشاور عقله وبيبص من بعيد عليا هو يشب وبيص وانا اوطي راسي وانغمس في الجهاز اه وربنا وهو يشب وانا اوطي ليه بقي سيتك التمثليه خلصت والتتر بيغني وحسيت بحركه غريبه وحركه غدر كده وهيطلبوا مني شاي مهو فضي بقي عارف انا هعمل ايه هقوم متأسفه اقفل الجهاز وتسحب كده وهما مش واخدين بالهم واتخمد انام بسرعه اهو وربنا بيبص دلوقتي وانا بكتب لا ياعم انا هقوم هي شغلانه بقي عشان تعرف اد ايه معاناتي مع الشاي
سلام لحسن اتقفش وابقي اشوف البوست

سمكه واحده يقول...

يانا العاشره مساء جت اهه يالا بقي سلام

Che يقول...

سمكه
حسيت انى كرهت الشاى لما قريت اللى انتى كاتباه عنه
هاتسناكى لما تفضى عشان اقرا تعليقاتك

صبرني يارب يقول...

يخرب عقلك حشيش ؟؟؟

ايامك مش فايته

ده بجد ده يا عمرو

وعلى فكره ابو الفوارس ده كان دفعتي فى ثانويه عامه اناا خر دفعة فى الثانويه العامه القديمه

بس انا الحمد لله اتخرجت وانا عندي 20 سنه

وبصرف النظر عن اكسبرشن لو كنت في تجاره

كأن تجاره مافيش فيها مذاكره

بس لمعلوماتك الخاصه كليه تجاره دي ممتعه فى الدراسه وفيها مواد جامده جدا ومش اي حد يفهمها كويس بس اصلاالعيال المتخلفين الىفى الكليات بيطلعوا منها زي البقر ولا مؤاخذه ولا اتعلموا ولا عرفوا حاجه


المهم حكايه الحشيش دي بصحيح ولا ايه يخرب عقلك

وبعدين الخلفيه الحمرا عمتني حرام عليك

وعشان قررت ازورك النهارده ما كتبتش بوست جديد انت رغاوي ايه يا عمرو هههههههههههههههه

Che يقول...

كنت باقولك خالتى بس ما طلعتى اكبر منى بسنه او بالكتير سنتين مش عارف افضل اقولك يا خالتى ولا ايه
مش مشكله
بصى بالنسبه لموضوع الحشيش فده حاجه اى شاب لازم يعدى عليها الا من رحم ربى و الحمدلله ربنا رحمنا دلوقتى و من ناحيه تانيه محدش معاه فلوس خلاص ... بس ما علينا
هاغير الخلفيه الحمرا بس لسه مش عارف بلون ايه
نورتينى و مستنى زيارتك الجايه و معلش انى خليتك ماتكتبيش بوست النهارده

ستيتة يقول...

تجاربك الذرية بتخليني مش عارفة انطق
مش عارفة اعلق اقول ايه اصلا
كل تجاربك صادمة وممتعة عارف ليه؟
اشك ان بنت سواء خرجت بعد اربع سنين ولا حتى عشرة تكون تعرف شيء عن عالم عمرو ده خالص
وبسألك سؤال هي دي التجارب اللي بتقعد قعدة سودة في الجامعة ولا القاعدة السودة هي اللي بتجيب التجارب دي؟
اسئلة منهمرة تشششششششششش
اولا الواد ابن خالتك غتت ليه؟
ثانيا مين قال ان الدكاترة بتتنطط ياض "وخد بالك اغلبهم مش مضطر يطنطط دول يسكعوا الواحد ملحق وهم أمامير خالص بس لو ضميرهم يسمح
ثالثا كان بذمتك بيجي بشبشب وترنج؟
رابعا ايه موضوع كرشه وكرشك ده "وش عبيط واهبل وميعرفش شيء في الدنيا والحمد لله مش عاوز يعرف
خامسا كونتينر السيد بيحشش وانتو رحتم في الهسهس ليه؟
سادسا احمد الله حمدا كثير طيبا مباركا فيه انكم اتخرجتم

Che يقول...

عمتى ستيته
مش عرف اقول ايه على تعليقك على تجاربى الذريه دى ... بس بالنسبه لموضوع القعده السوده اللى بتجيب التجارب ولا التجارب هى اللى بتجيب القعده السوده سؤالك ده فكرنى بالبيضه و الفرخه .... بصى هى الفكرة مش فى التجارب ولا فى القعده ... الفكرة فى اللمه و الصحبه ، و انا و الحمدلله كنت اعرف اجدع ناس و احلى لمه و كان شعارنا " يا نعيش عيشه فل ، يا نموت احنا الكل " و الحمدلله عشنا بالطول و العرض
ابن خالتى غتت ليه ... هو كده ... و بالنسبه لموضوع ضمير الدكاترة فده حاجه انا مش متاكد منها اوى بس الله اعلم بالنوايا ... يمكن بيحبونا عشان كده بيكونوا مش قادريين على بعدنا
و بالنسبه لابو الفوارس والله كان بيجى بشبشب و ترنج و انا اعتقد انه لسه ماخلصش و بالتالى ممكن تشوفيه لو دخلتى سكشن ولا حاجه .. انا اخر مرة سبته فى رابعه و بما ان رابعه عدد مرات السقوط مفتوح فيها فاكيد هتلاقيه لسه قاعد الا لو كان ربنا نفخ فى صورته و خرج من الكليه
بالنسبه لموضوع كرشه و كرشك فانا هاستعير الوش العبيط و اقول لا تعليق
الاخ اللى كان بيحشش كان بياخد مزاجه ... يعنى الراجل عزم علينا و احنا قلنا لا ... يعنى عداه العيب و قزح
سادسا انا كمان باحمد ربنا على انه خرجنا من الكليه دى على خير طبعا باستثناء العقد النفسيه و الكوابيس اللى مخليه شويه مننا يتعالجوا نفسيا دلوقتى

Unknown يقول...

لسا ما استلمتش الشهاده؟ يا سلااام!!!

بس تعرف يا عمرو؛ هاي كلية العلوم إلها فايدة واحده؛ عطتك كوم قصص تسلينا بيها

ولو إني شايفه كان لازم رحت آداب؛ كنت صقلت هالموهبة الخطيره
جد دمك خفيف يا عم عمرو:)

Che يقول...

مياسى
انا لو عارف انك هتيجى بسرعه كده لما اعلق عندك كنت مليت الصفحه تعليقات عشان تيجى كل شويه
و والله لسه ماستلمتش الشهاده كل ماروح يقولولى لسه ماجتش ، اقولك يا جماعه ان بقالى سنتين مخلص ، يقولولى يعنى متعجل ليه هاتعمل بيها ايه ، و طبعا مش مناسب اقولهم عشان اعلقها فى الحمام فاسكت و امشى
و بالنسبه لكليه اداب عندنا فدى بتموت الموهبه مش بتصقلها زى ما انتى متخيله .. ده غير انى شايف انى مش موهوب للدرجه اللى تخلينى ادور على حد يصقلى موهبه .. كل العمليه انى بادردش معاكوا مش اكتر
نورتينى و ماتغيبيش عليا عشان بتوحشينى

Unknown يقول...

عمرو

أنا جيت من الريدر مش من تعليقك:)

الحق عالريدر يا عمرو مش علي!!

هايني رايحه أشوف شو تعليقك يا خي:)

بس يا عمرو انتا دردشتك ظريفة جدا كل يوم بتأكد إنك جوزاء فعلا!!!

Che يقول...

معلش يا مياسى ( وش مكسوف موت و محمر زى البنادورة - حته شامى اهو .. هههه ) .. بم انى جوزاء و انتى جوزاء فانتى اكيد عارفه اد ايه احنا متسرعين بس سيبك انتى ... قلبنا ابيض
نورتينى تانى و جاى وراكى جرى اشوفك ردك على تعليقى

عاشقه وغلبانه يقول...

يانهار ابيض بقي انت بتيجي عندي كل بوست وانااول مره اجي هنا
دي قله ذوق مني علي فكره
بس عذري معايا والله لان عقلي مش معايا اساسا
المهم
عايزه اضحك علي البوست
بجد انتوا فضلتوا كام سنه في الكليه دي........؟؟؟؟

Che يقول...

عاشقه
لا قله ذوق منك ولا حاجه ... ربنا يكون فى عونك ... و بعدين الاجانب بيقولوا better late than never .. اهلا بيكى فى كل وقت
بالنسبه لقعدنا اد ايه فى الكليه ففى ناس قعدت 7 سنين و ناس 8 و ناس 9 و ناس 10 و ناس 11 و ناس لسه لغايه دلوقتى للسنه ال 13 بنجاح مستمر
نورتينى و مستنى تعليقاتك على طول

سمكه واحده يقول...

ايوه ايوه انا جيت اهو الصبح وبابا مش موجود واخد بالك انت عشان اعلق برحتي هعمل ايه بقي الشاي وسنينه

بالنسبه بقي يا نعيش عيشه فل يا نموت احنا الكل . كان نفسي نفسي كنت ابقي ولد ياااه مكنوش هيلاقوني كنت هصيع صياعه ومكنتش هعمل شاي !

بالنسبه لابوا الفوارس انا عن نفسي وانا في الكليه مكنتش بزاكر غير قبل الامتحان بيوم مش عارفه تقول كسل مليش نفس وكنت اروح رايقه الصبح وكله وشه اصفر وخايف وانا ولا افقه شئ بس كانوا يقولوا يالئيمه تلاقي مخلصه عبط دول ولا ايه! بس سبحان الله كنت بنجح بدعاء الوالدين سيبك انت
التعليم نفسه غلط وكله بيدخل الكليات يطلع منها ابيض اه والله

هو الاعتماد المفروض يكون علي الثقافه العامه وخدلي بالك انت بالنسبه للحشيش وكده معرفش ليه غيتكوا يا ولاد فأنكوا تجربوه وهتستفيدوا ايه بس ياله ربنا تاب عليكوا خلاص سماح يمكن انا لو كنت ولد كنت جربته ينكن مينكنش ليه

ياله بقي هت الشخصيات اللي بعد كده مستنين الجديد
تحياتي

Che يقول...

ايه ده كله يا سمكه ... كل دى كبايه شاى و العاشرة مساء ، ماشى يا ستى
عارف والله اللى انتى بتقوليه على المذاكره احنا كنا بنذاكر و برضه كنا بنجح بفضل ربنا و بدعا الوالدين برضه
بس بالنسبه لموضوع الثقافه العامه ماينفعش عندنا فى الكيميا و البيولوجى و لو مش مصدقه اسئلى عمتى ستيته ... بالنسبه للحشيش كله والله بيشربه دلوقتى ولاد و بنات و رجاله و ستات و بعض من الاطفال ... ربنا يبعدك عنه يا رب
و اكيد انا لسه عندى شخصيات كتير و هاخليكوا تقابلوها شخصيه شخصيه ان كان فى عمر و نصيب
نورتينى يا جميل و ماتغيبيش عليا

عاشقه وغلبانه يقول...

13 والعرض مستمر
ده انا اخدت طب في 7 سنين ونص طلعوا عنينا وزهقنا من شكل الكليه
وبعدين الكليات مابقاش يتقعد فيها
ههههههههههههههههه

ربنا يهون علي اللي لسه مستمرين

غير معرف يقول...

ازيك ياعمرو ابو الفوارس ده كان ايام الامتحانات يدخل متاخر نص ساعه قالي يعني بيرجع لاخر لحظه طب مرجعش ليه من 13 سنه سلام

Che يقول...

عاشقه و غلبانه
خدتى الكليه فى سبع سنين و نص او فى سبعين سنه بس اسمك دكتورة فى الاخر ... يعنى اللى بيدخل هندسه بيطلع مهندس ، اللى بيدخل حقوق بيطلع محامى .. كده يعنى .. انما اللى بيدخل علوم بيطلع ايه .. بيطلع يا صايع يا ميديكال ريب ... ماعلينا
نورتينى و مستنى زيارتك دايما

Che يقول...

غير معرف
يا ترى انت مين ... شكلك اللى فى بالى ، مش مهم
كل اللى انت قولته عندك حق فيه .. بس تعمل نزعه المذاكره و المراجعه واكلاه أوى
نورتينى

البت المشمشية حلوة بس شقية يقول...

رغى رغى رغى
ايه ده كلو
حشيش حشيش فايدة فيك شكلى هبلغ فيك وفى مدونتك

Che يقول...

مشمشيه
انا باحب الرغى لسببين .. الاول انى جوزاء و التانى عشان بينسينى انه وسكى بيوجعنى ... ههههههه
و والنبى ماتبلغى فيا و فى المدونه قبل ماخلص الرغى اللى عندى كله
نورتينى يا جميل

a mero يقول...

افتكرت لما قريت اللي انت كتبته عن ابو الفوارس اني مره قابلته بعد امتحان الhetero و كان الأمتحان 5 اسئله و قاللي انا حليت a من السؤال الأول
و c و d من السؤال الرابع ممكن أنجح ؟؟؟؟

اما عن أبو الفوارس سمعت أن الكليه قررت تبني نصب تذكاري بأسمه

Che يقول...

ميرا حبيب قلبى
الحمدلله انى ماكنتش انا اللى سأله ... طبعا انت بحنيه قلبك المعتاده قلتله انه ان شاء الله ههينجح بس يشد حيله
و ايه اللى خلاك تفتكر ال hetero و الزفت ... الحمدلله ربنا خرجنا منها على خير

Magi Mostafa يقول...

بجد عجبانى المدونه دى يمكن عشان كنت فاكرة انى شفت الى محدش شافه فى الكليه الهباب دى بس اتضح انك شفت اكتر رغم انى اتخرجت فى اربع سنين يعنى عموما انت خدت براءه والا لسه
اقولك على حاجه انا مبحبش اعمم بس الكليه دى مش بتاعت الاولاد دايما بقول كده من سنه اولى معندكمش قدرة تحمل ولا وقت صراحه ليها

Che يقول...

magi
لو لسه ذاكرتى شغاله يبقى ده اول تعليق بيكى و يا مراحب و لو الذاكره بتلعب معايا و انتى علقتى قبل كده يبقى برضه يا مراحب
انا بجد معرفش انتى شفتى ايه فى الكليه بس انا اكمنى قعدت كتييييييييييييير شفت حاجات كتير أوى
الا انتى كنتى قسم ايه ... انا اتخرجت من سنتين بس لسه سايب ضحايا ورايا فى الكليه
و عندك حق ان الكليه دى مش لينا لاننا كنا علوم قسم العاب .. بس الكليه زى ما انتى محتاجه تحمل و وقت زى الحمل بالظبط
نورتينى و مستنى تعليقاتك على طول

hasona يقول...

السلام عليكم
أبو الفوارس
أولا :مالهم بتوع التجارة بقي
ثانيا : لو ضربتم صاروخين حشيش كنتم نجحتوا بتفوق
،،،
كنا بنسمي أمثال أبو الفوارس ( المتفوقين ) لأننا كنا بنحس ان مش أي حد يقدر يعمل كده
،،،
منتظرين الكثير عنك وعن أبو الفوارس

تقبل تحياتي

Che يقول...

hasona
و عليكم السلام و رحمه الله و بركاته يا عم حسونه
اولا بتوع تجاره اجدع ناس يا عم بس المشهور عنهم انهم بيذاكروا فى اخر الاخر
ثلنيا انا دلوقتى ندمان على موضوع الحشيش ده بعد ما كده كده شلنا الماده يعنى لا مننا نجحنا و لا انبسطنا
و انا فعلا متفق معاك ان ابو الفوارس ده اكبر ميزة موجوده فيه مش موجوده فى ناس كتير انه فعلا عنده اصرار و دى حاجه تستاهل الاحترام و التقدير
نورتنى يا عم حسونه و اسمع اجدع سلام لبتوع تجارة

Unknown يقول...

حلوة الحكاية دى....انا اسمع ان علوم صعبة بس اول مرة اعرف انها الجحيم بعينه

Che يقول...

enjy
علوم صعبه .. صعبه دى اسهل و ابسط كلمه ممكن تتقال عن علوم
انتى عارفه اللى بيدخل علوم بيكون محظوظ عشان ربنا بيكفر عنه سيئاته و بيسلط عليه ناس ( ربنا يهديها ) عشان يتعلم و يعرف ان الله حق
نورتينى

!!! عارفة ... مش عارف ليه يقول...

انا جيت قبل كده ومقدرتش اعلق
لأني عملت دماغ على اخر التدوينة

المرة دي جايلك فايق اهووو علشان
ابلغك السلام لأبو الفوارس بس من بعيد لبعيد

والسلام امانة

تحياتي
وليد

Che يقول...

وليد باشا
انت تقريبا عملت دماغ على الريحه بتاعت الواد صاحب ابو الفوارس و هو بيضرب
و عينى هاوصل السلام لابو الفوارس من بعيد لبعيد ... و اطمن الامانه وصلت
نوتنى يا باشا و مستنى تعليقاتك دايما

Desert cat يقول...

ابو الفوارس ده فكرنى باحمد ادم فى يا تحب يا تقب مع اختلاف المشاهد
بس صاحبك بتاع التعليقات اللى بيقوله البس الجلابية واللاسه ده باين عليه زى السكر انا الحقيقة او عندى شلة زى بتاعتك دى اجيبهم اقعدهم معايا طول النهار ومش اخرج من البيت لحد ما اكتب قصة فيلم كوميدى ممكن يكسر الدنيا
مش بهزر والله بكلمك بكل امانة

تحياتى

Che يقول...

قطه
والله ابو الفوارس ده حكايه كبيره و بالنسبه لصاحبى بتاع التعليقات ده اكتر واحد سافل فى اصحابى بس زى العسل
و لو عايزة انا ممكن اسلفهملك و الفيلم ايرادته النص بالنص
نورتينى يا جميل

غير معرف يقول...

ballona
انا او ل مرة ادخل . بس انت مش مديني حقي وانت عارف اني جندي مجهول في كل القصص دي . وبعرف من وانا عندي 12 سنة

Che يقول...

بل حبيب قلبى
يا باشا انت مقامك كبير أوى و ماينفعش اكتب اى كلام عنك
و بعدين ايه يعنى .. طب مانا سوبر فايزر من و انا فى سنه تانيه كليه .. ههههه
ربنا حليم ستار يا بل
نورتنى يا بالونتى