بعد البوست اللى فات اللى ناس كتير ماعلقوش عليه تقريبا عشان الفول و البصل و بعد مطالبه من عمتى ستيته انى ارجع اتكلم عن الامتحانات و عشان انا اتكلمت شويه عن الامتحانات و و كنت وعدتكوا انى اكمل كلام و انا دايما احب اوفى بوعدى و اخيرا عشان ده موسم امتحانات و انا حابب انى انكد على الناس اللى بتمتحن ( ندل و خلصت امتحانات مانكدش ليه على اللى لسه ماخلصوش ) .. قلت اجى ادردش معاكوا النهارده شويه كمان عن الامتحانات
زى ما كنت قلتلكوا قبل كده على ان الامتحانات فى كليتنا 3 انواع .. عايز اكلمكوا النهارده شويه عن انواع الامتحانات نفسها اللى احنا امتحناها ... و كل نوع امتحان بيتوقف على شخصيه الدكتور اللى بيحطه .. و عشان الدكاترة بتوعنا اغلبهم معقدين ( الا من رحم ربى ) فهما هيطلعوا العقد دى على مين غير على الخدم و الجوارى اللى رماهم الزمن فى الكليه دى ..و طبعا انتوا عارفين مين الخدم و الجوارى فامتحرجونيش اكتر من كده
و الامتحانات عندنا قسمين كبار جدا قسم اسمه Short Notes و بالبلدى يعنى دش .. قول كل ما تعرفه عن .. علل .. كده يعنى .. و بما اننا كنا فى علوم يعنى اجدع ناس و بنعرف نعمل كل حاجه فالدكاترة كانت دايما بتشترط اننا نضمن اجابتنا رسوم توضيحيه .. بيانيه ... مخططات .. اى حاجه المهم انهم يخلونا نطلع موهبه الرسم الدفينه اللى جوانا على الورق بتاع الاجابه .... القسم التانى من الامتحانات كان اسمه MCQ و دى اختصار ل Multi Choice Questions يعنى اسئله الاختيار من متعدد .. زى اختار .. اكمل .. صح و غلط .. و طبعا صح و غلط مع التعليل يعنى صح ليه و غلط مش كفته تضرب صح و تيجى مع العمى طابات و تاخد الدرجه
نتكلم بأه عن انواع الدكاتره ... فى دكاتره كانوا طيبين و كانوا اللى بيقولوه فى المحاضره هو اللى بيجى فى الامتحان .. الدكاتره دى كان كل اللى يهمها ان الطالب يكون فاهم و بعد كده هينجح و اتذكر من الدكاتره دول د.عبد الرحمن بشتر فى قسم الحيوان .. د.بركات فى قسم النبات ( وده كان الدكتور الوحيد الكويس اللى انا قابلته فى القسم المهبب ده و كان الاستثناء اللى بيدل ان القاعده فى نبات انهم يكونوا معقدين ) ... و د.ابو طبل فى الكيميا .. و د.احمد عثمان رحمه الله عليه فى الفيزيا .. و عندنا فى القسم كانوا كتير ( و الشهاده لله ) الدكاتره الكويسه كانوا كتار عندنا فى القسم و القله هما اللى ولاد .... ( ولا بلاش الواحد مش ناقص ذنوب و دول كانوا دكاترتنا فى يوم من الايام الغبره برضه ) .. د.نعيم و د.عصام درويش عليه رحمه الله و مراته د.عليا و دول كانوا ابرز الناس اللى انا اتاثرت بيهم مع انه ماكانش ليا اى احتكاك بدكتوره عليا و كان كلامى قليل جدا مع دكتور عصام الله يرحمه بس كان اكتر كلامى مع دكتور نعيم اللى بحرص على زيارته كل ماروح الكليه .. فى دكاتره زى ما قلت كانوا اللى بيقولوه بيجيبوه .. فى دكاتره تانى كانت بتحرص ازاى تخوزق الطالب و مش اى خازوق انما يكون تعبان و هو بيتخوزق .. يعنى حتى مش يكون متكيف ( و الظاهر انهم ماكانوش مؤمنين بالمثل اللى بيقول " اذا حاول احد اغتصابك و لم تستطع المقاومه فحاول الاستمتاع " كانوا بيستكتروا الاستمتاع علينا و هى هونجا بونجا حتى الموت ) .. يعنى مثلا يقعد طول السنه يشرح و يركز على حاجه و احنا طبعا بقر نقعد نصم الحاجه دى و مانركزش أوى على الباقى و يجى فى اخر السنه يلغيها و نبقى محتارين هنتسأل فى ايه .. دكاتره تانيه فى اسئله الاختيار من متعدد يجيبلك سؤال ليه اربع اجابات .. مش تختار الاجابه الصح زى باقى مخاليق ربنا .. لا ازاى .. امال يبقى دكتور و احنا العبيد فى التكيه بتاعته ازاى .. يجيب الاربع اجابات صح و المفروض انى انا اختار اكتر اجابه صح فيهم .. شوف الجبروت .. بالنسبه للاجابات بتاعت الدش و الرغى تلاقى دكتور يقولك جاوب فيما لا يقل عن 10 سطور .. ما احنا فاضيين بأه ورانا ايه .. و دكتور تانى يقولك جاوب فيما لا يزيد عن 3 سطور و تبقى محتار تكتب ايه فى التلات سطور دول عشان تاخد الدرجه
سيبنا من الاسئله شويه و نتكلم على التصحيح ... فى الاسئله بتاعت الاختيار من متعدد الدكاتره عشان تخلينا مانفتيش و نقعد نحل و خلاص على اساس انه كده كده خربانه تلاقى ناس تقولك صح و غلط مع التعليل و لو حليت من غير التعليل ماتخدش درجه على اساس انك طعمجى ( يعنى بتاع طعميه ) و الاجابه جت معاك كده .. فى دكاتره تانيه بتتعامل من المنبع زى الضرايب .. يصححوا بالنظام الامريكانى .. يعنى الغلط يشيل الصح .. و تلاقى ناس مثلا جايبه -6 يعنى داخله امتحان اخر السنه و هى عليها درجات وده اكتر قسم مشهور بيه رياضه و حاسب الى .. بس عادى رياضه مافيهاش غير 4 و ساعات 3 فى الدفعه .. يعنى مقدور عليهم
دكاتره تانيه و خصوصا فى قسمنا اكمن عددنا قليل و الدكاترة عارفينا شخصيا الدكتور بيصحح الورقه على حسب حبه ليك و حضورك المحاضرات و السكاشن ... و يحضرنى هنا موقف جامد جدا .. كنا فى رابعه مش بنحب نحضر محاضرات على اساس انه مالهاش لازمه و مخدناش بالنا ان الدكاتره بتوع رابعه ماكانوش يعرفونا ( و عشان تعرفوا اد ايه احنا كنا معروفين .. انا مثلا كنت باقعد على باب القسم الصبح اشرب شاى مع عم يحيى و الطلبه الجداد الوظاويظ الصغيرين و هما طالعين القسم يعدوا على و يبوسوا ايدى و يقولولى ادعيلنا يا عم عمرو ) .. المهم عدينا الترم الاول و نجحنا فى المواد بتاعت القسم بتاعنا ( بغض النظر عن اننا نجحنا الترم كله ولا لا ) .. الترم التانى الدكاترة اللى مايعرفوناش ابتدوا ياخدوا بالهم انه فى اسامى فى الكشف هما ماشافوش صحابها .. كانوا بيدخلوا السكاشن بس احنا كنا بندخل السكاشن بعد الشرح .. نبص على الكام عينه لو السكشن عينات او نبص على العيال و هى بتعمل التجارب لو السكشن تجارب و بعد كده نمشى كاننا دكاترة بتشرف على الطلبه .. المهم جينا يوم امتحان اعمال السنه الدكتور ده دخل و قعد يبص فى السكشن و راح لاممنا كلنا و مقعدنا ورا بعض و لم الورق بتاعنا مع بعضه بعيد عن باقى الدفعه ... ماخدناش خوانه .. جينا يوم الامتحان العملى لقيناه واقف فى اول السكشن و معاه الكشف بتاع الاسامى و جنبه معيد .. الدكتور يشاور علينا و المعيد يقوله اسامينا فى ودنه و هو يعلم فى الكشف ... برضه ماخدناش خوانه لغايه ما نتيجه العملى و اعمال السنه طلعت و لقينا نفسنا ( 9 افراد ) كلنا جايبين نفس الدرجه .. جه الدكتور و ختمها انه سقطنا فى الامتحان و قالنا وش عشان نبقى نحضر السنه الجايه .. برضه محضرناش بس ربنا كتبلنا كلنا النجاح و خلصنا من الماده الزفت دى و الدك تور ده و الكليه الهم دى .. لسه عندى حكايات كتير عن الامتحانات و هاكملها بعدين بس عشان ماطولش عليكو دلوقتى ............. سلام
زى ما كنت قلتلكوا قبل كده على ان الامتحانات فى كليتنا 3 انواع .. عايز اكلمكوا النهارده شويه عن انواع الامتحانات نفسها اللى احنا امتحناها ... و كل نوع امتحان بيتوقف على شخصيه الدكتور اللى بيحطه .. و عشان الدكاترة بتوعنا اغلبهم معقدين ( الا من رحم ربى ) فهما هيطلعوا العقد دى على مين غير على الخدم و الجوارى اللى رماهم الزمن فى الكليه دى ..و طبعا انتوا عارفين مين الخدم و الجوارى فامتحرجونيش اكتر من كده
و الامتحانات عندنا قسمين كبار جدا قسم اسمه Short Notes و بالبلدى يعنى دش .. قول كل ما تعرفه عن .. علل .. كده يعنى .. و بما اننا كنا فى علوم يعنى اجدع ناس و بنعرف نعمل كل حاجه فالدكاترة كانت دايما بتشترط اننا نضمن اجابتنا رسوم توضيحيه .. بيانيه ... مخططات .. اى حاجه المهم انهم يخلونا نطلع موهبه الرسم الدفينه اللى جوانا على الورق بتاع الاجابه .... القسم التانى من الامتحانات كان اسمه MCQ و دى اختصار ل Multi Choice Questions يعنى اسئله الاختيار من متعدد .. زى اختار .. اكمل .. صح و غلط .. و طبعا صح و غلط مع التعليل يعنى صح ليه و غلط مش كفته تضرب صح و تيجى مع العمى طابات و تاخد الدرجه
نتكلم بأه عن انواع الدكاتره ... فى دكاتره كانوا طيبين و كانوا اللى بيقولوه فى المحاضره هو اللى بيجى فى الامتحان .. الدكاتره دى كان كل اللى يهمها ان الطالب يكون فاهم و بعد كده هينجح و اتذكر من الدكاتره دول د.عبد الرحمن بشتر فى قسم الحيوان .. د.بركات فى قسم النبات ( وده كان الدكتور الوحيد الكويس اللى انا قابلته فى القسم المهبب ده و كان الاستثناء اللى بيدل ان القاعده فى نبات انهم يكونوا معقدين ) ... و د.ابو طبل فى الكيميا .. و د.احمد عثمان رحمه الله عليه فى الفيزيا .. و عندنا فى القسم كانوا كتير ( و الشهاده لله ) الدكاتره الكويسه كانوا كتار عندنا فى القسم و القله هما اللى ولاد .... ( ولا بلاش الواحد مش ناقص ذنوب و دول كانوا دكاترتنا فى يوم من الايام الغبره برضه ) .. د.نعيم و د.عصام درويش عليه رحمه الله و مراته د.عليا و دول كانوا ابرز الناس اللى انا اتاثرت بيهم مع انه ماكانش ليا اى احتكاك بدكتوره عليا و كان كلامى قليل جدا مع دكتور عصام الله يرحمه بس كان اكتر كلامى مع دكتور نعيم اللى بحرص على زيارته كل ماروح الكليه .. فى دكاتره زى ما قلت كانوا اللى بيقولوه بيجيبوه .. فى دكاتره تانى كانت بتحرص ازاى تخوزق الطالب و مش اى خازوق انما يكون تعبان و هو بيتخوزق .. يعنى حتى مش يكون متكيف ( و الظاهر انهم ماكانوش مؤمنين بالمثل اللى بيقول " اذا حاول احد اغتصابك و لم تستطع المقاومه فحاول الاستمتاع " كانوا بيستكتروا الاستمتاع علينا و هى هونجا بونجا حتى الموت ) .. يعنى مثلا يقعد طول السنه يشرح و يركز على حاجه و احنا طبعا بقر نقعد نصم الحاجه دى و مانركزش أوى على الباقى و يجى فى اخر السنه يلغيها و نبقى محتارين هنتسأل فى ايه .. دكاتره تانيه فى اسئله الاختيار من متعدد يجيبلك سؤال ليه اربع اجابات .. مش تختار الاجابه الصح زى باقى مخاليق ربنا .. لا ازاى .. امال يبقى دكتور و احنا العبيد فى التكيه بتاعته ازاى .. يجيب الاربع اجابات صح و المفروض انى انا اختار اكتر اجابه صح فيهم .. شوف الجبروت .. بالنسبه للاجابات بتاعت الدش و الرغى تلاقى دكتور يقولك جاوب فيما لا يقل عن 10 سطور .. ما احنا فاضيين بأه ورانا ايه .. و دكتور تانى يقولك جاوب فيما لا يزيد عن 3 سطور و تبقى محتار تكتب ايه فى التلات سطور دول عشان تاخد الدرجه
سيبنا من الاسئله شويه و نتكلم على التصحيح ... فى الاسئله بتاعت الاختيار من متعدد الدكاتره عشان تخلينا مانفتيش و نقعد نحل و خلاص على اساس انه كده كده خربانه تلاقى ناس تقولك صح و غلط مع التعليل و لو حليت من غير التعليل ماتخدش درجه على اساس انك طعمجى ( يعنى بتاع طعميه ) و الاجابه جت معاك كده .. فى دكاتره تانيه بتتعامل من المنبع زى الضرايب .. يصححوا بالنظام الامريكانى .. يعنى الغلط يشيل الصح .. و تلاقى ناس مثلا جايبه -6 يعنى داخله امتحان اخر السنه و هى عليها درجات وده اكتر قسم مشهور بيه رياضه و حاسب الى .. بس عادى رياضه مافيهاش غير 4 و ساعات 3 فى الدفعه .. يعنى مقدور عليهم
دكاتره تانيه و خصوصا فى قسمنا اكمن عددنا قليل و الدكاترة عارفينا شخصيا الدكتور بيصحح الورقه على حسب حبه ليك و حضورك المحاضرات و السكاشن ... و يحضرنى هنا موقف جامد جدا .. كنا فى رابعه مش بنحب نحضر محاضرات على اساس انه مالهاش لازمه و مخدناش بالنا ان الدكاتره بتوع رابعه ماكانوش يعرفونا ( و عشان تعرفوا اد ايه احنا كنا معروفين .. انا مثلا كنت باقعد على باب القسم الصبح اشرب شاى مع عم يحيى و الطلبه الجداد الوظاويظ الصغيرين و هما طالعين القسم يعدوا على و يبوسوا ايدى و يقولولى ادعيلنا يا عم عمرو ) .. المهم عدينا الترم الاول و نجحنا فى المواد بتاعت القسم بتاعنا ( بغض النظر عن اننا نجحنا الترم كله ولا لا ) .. الترم التانى الدكاترة اللى مايعرفوناش ابتدوا ياخدوا بالهم انه فى اسامى فى الكشف هما ماشافوش صحابها .. كانوا بيدخلوا السكاشن بس احنا كنا بندخل السكاشن بعد الشرح .. نبص على الكام عينه لو السكشن عينات او نبص على العيال و هى بتعمل التجارب لو السكشن تجارب و بعد كده نمشى كاننا دكاترة بتشرف على الطلبه .. المهم جينا يوم امتحان اعمال السنه الدكتور ده دخل و قعد يبص فى السكشن و راح لاممنا كلنا و مقعدنا ورا بعض و لم الورق بتاعنا مع بعضه بعيد عن باقى الدفعه ... ماخدناش خوانه .. جينا يوم الامتحان العملى لقيناه واقف فى اول السكشن و معاه الكشف بتاع الاسامى و جنبه معيد .. الدكتور يشاور علينا و المعيد يقوله اسامينا فى ودنه و هو يعلم فى الكشف ... برضه ماخدناش خوانه لغايه ما نتيجه العملى و اعمال السنه طلعت و لقينا نفسنا ( 9 افراد ) كلنا جايبين نفس الدرجه .. جه الدكتور و ختمها انه سقطنا فى الامتحان و قالنا وش عشان نبقى نحضر السنه الجايه .. برضه محضرناش بس ربنا كتبلنا كلنا النجاح و خلصنا من الماده الزفت دى و الدك تور ده و الكليه الهم دى .. لسه عندى حكايات كتير عن الامتحانات و هاكملها بعدين بس عشان ماطولش عليكو دلوقتى ............. سلام
هناك 18 تعليقًا:
متشكرين ياعمرو علي السياح ده
العفو يا عم نادر
مش نادر برضه ولا ابه النظام
والله لوريك انت بتمتحن ذكائي
ليكو يوم من اوله
اوافقك تماما ان قسم نبات اسخف قسم في الكلية والدكاترة بتوعه اتلموا على بعض ازااااااااي والله ماعرف يمكن من قبيل كل شلو يشبهلو
الكيميا فيها ناس كتير قوي كويسين بس يمكن مدرسوش ليكم واهمهم د/ امين بركة ودكتور احمد فؤاد باشا
ماسمهاش علياء يابابا وده يعني انك حتى مكنتش بتحضر محاضرتها علشان تعرف اسمها أو بتحضر لأغراض تانية خالص
عصام الله يرحمه كان كريزما فعلا وكون د نعيم الأقرب للطلبه فهو الاقرب للطلبه من قبل كده بعشرين سنه
دكاترة علوم معقدين؟ بس ده انت بترحمهم وتسايسهم
حد يجيبلي الواد اللي قاعد مع يحي تحت ده عوزااااااااااااااه . حلقي عليه ياسيده
بمناسبة الغش انا متخصصة وواخده دكتوراه فيها
واذكر فيما اذكر ان زميل الله يرحمه وكان بيراقب في لجنة جنبي
جه قال لي انا عرفت انك الخبيرة في بنت عندي بتغش والنبي والنبي ها اموت واعرف بتغش من ايه انا غلب غولبي
رحت لقيت بنت اللزينة كاتبه المنهج على فخد البنطلون الجينز وقاعده مربعه
طبعا الرجال المحترمين في اللجنه مكسوفين من القاعده الطين يجوا ناحيتها وهي شغالة الله ينور
وفي حدوتة قبل النوم بكره ابقى احكي لك عن اللي كان مخبي البرشام في سوستة البنطلون
عيال عاوزة الحرق وعلشان كده ربنا جابهم عندنا في جهنم علوم علشان نجيب ليهم واوا في نوفوخهم
عمتى ستيته
انا عارف ان اسمها دكتوره عليا بس مش عارف ان كان فى همزة فى اخر الاسم و احنا بننطقه كده بالعاميه ولا لا .. و فعلا انا ماكنتش باحضر محاضرات و وضحت ده انه ماكنش ليا احتكاك بيها و عمرى ما كان ليا اغراض تانيه ولا تالته .. يعنى انا لو كان ليا اغراض تانيه كنت قعدت فى الكليه الوقت اللى انا قعدته ده كله .. انا طول عمرى عينى مليانه مش زى فناجيلى .. و بعدين الدنيا ماضاقتش بيا عشان ابص على بنات علوم اللى على رأى جورج صاحبى " الحلوة فيهم عامله دوجلاس " .. و الكلام اللى انتى قلتيه على دكتور عصام الله يرحمه ده صح و ممكن يتقال اكتر منه كمان الف مرة لانه كان بجد واحد من اكتر الناس المحترمه اللى انا قابلتها جوة الكليه و براها .. اما دكتور نعيم فانا اعرفه من زمان لانى قعدت فى القسم كتير جدااااااااا
و الحقيقه انه مش كلهم معقدين عشان كده انا كتبت الا من رحم ربى بس الحقيقه انه اغلبهم معقدين و انا مستعد اعمل استفتاء عشان تشوفى النتيجه بنفسك
يا ترى عرفتى الدكتور اللى انا كنت باتكلم عليه انه سقطنا ولا لا ؟؟ ههههههههه
عمتى ستيته
انا مالحقتش اتكلم عن الغش لانه اساليبه كتيره جدا ... و بالنسبه للى كان مخبى البرشام فى سوسته البنطلون فدى قديمه لان فناجيلى صاحبى عملها قبل كده و اتقفش و كان يوم طين على دماغه مانجدوش غير د.نعيم
و حقيقه احنا كنا بنكفر عن اعمالنا الوحشه فى علوم ... بس فى سؤال احنا عرفنا بما اننا طلبه اننا بنكفر عن ذنوبنا و ان ربنا مسلط علينا الدكاتره عشان كده ... يا ترى الدكاتره بكفر عن ذنوبها ازاى
فيه مطعم اسمه ..... وثوم ده اسم ابو الدكتور كلاكيعو اللي سقطكم
الدكاترة بتكفر سيئات بعض تخيل انت خمسين عقلية علمية مستفزة بتعذب في بعض بأساليب هتلر يتعلم منها
ايييييييييه دنيا
عمتى ستيته
مش ده الدكتور اللى انا قصدى عليه .. الدكتور اللى انتى قلتى عليه ده ابنه المعيد فى قسم حيوان من اعز الناس عليا و من اجدع الناس اللى انا عرفتها .. بس الدكتور اللى انا باتكلم عليه فى البوست ليه صله قرابه بشكل ما مع الدكتور اللى انتى قلتى عليه
هش
ده طيب جدا استحالة
والله عجيب هذا وغريب
ماعلينا
قطيعه محدش بياكلها بالساهل
بس تستاهلوا السؤال بقى ليه هو اللي سقطكم في السنه دي ومسقطكمش السنه اللي بعدها؟
ما انا عارف يا عمتى ستيته انه طيب .. طيبته دى خلتنى اشيل الماده على 2.5 درجه و مادخلش سبتمبر عشان الترم التانى كان معايا 3 مواد عشان درجتين و نص و احنا مجموع درجاتنا فى الاربع سنين 8000 درجه .. و اللى خلانا ننجح السنه اللى بعديها ايه .. الله اعلم
برضه ماحضرناش محاضرات و لا اشتغلنا فى معامل و ممكن تسألى المعيدين علينا لاننا كنا اشهر الناس اللى دخلت القسم ده
والله كانت ايام ما يعلم بيها الا ربنا ايام الامتحانات دى وبمناسبة الغش افتكر اول سنة فى الكلية ودى عند الكل سنة التوهان والضياع عن نفسى انا كنت بذاكر مواد تانية غير المقرر واكتشف ده فى الامتحان واسيب الورقة وامشى كنت مرة فى امتحان رياضة فى سنة اولى واكتشقت نه ولا كلمة من اللى ذاكرتها موجودة فى الامتحان لانى كنت مذاكر مقرر قديم واتلغى المهم مينفعش اخرج فى اول الامتحان لازم اقعد شوية ومش عارف اكتب اى حاجه واللى جنبى شغالة فى الورقة وانا مش بغش ومعنديش استعداد انى اغش حتى لو الورقة فاضية والاقى الحاجه اللى جانبى بتسألنى السؤال التالت حل المسألة ايه كنت عايز اشتم واقل ادبى بس تمالكت نفسى وقلتلها لسه موصلتلوش انتى شوفتينى كتبت حاجه فى الورقة
انا من اسيوط بس ابو طبل بتاعكم ده ليه اخ غالبا فى صيدله القاهره بس ايه بقى تحس و انت داخل تمتحن الشفوى عنده انك داخل تعزى من الغم و الكابه اصل احنا كان عندنا شفوى و بيجى فيه دكاتره من جامعات تانيه
يوووووووووه كانت ايام نكد الله لا يرجعها احلى ما فيها الكافتريا و سندوتشات الطعميه اصلى كنت صيدله انتساب باحضر السكاشن بس المحاضرات كانت بتشوكنى
زمايلنا اللى كانوا بيعملوا التبيضات بتاعه المحاضرات كانوا بيكتبوا الكلام الهزار اللى الدكتور قاله فى المحاضره عشان ساعه الشفوى كانوا بيسألوناعن الحاجات دى شفت السواسه بتاعه الدكاتره قد ايه
ابن همام
والله عندك حق انه اول سنه دى سنه الضياع و التوهان
و مسيرى هاحكى عن الغش و اساليبه
صيدلانيه
يمكن يكون ابو طبل ليه اخ و يمكن لا .. و انا مصدقك على امتحانات الشفوى .. احنا لو كان عندنا امتحانات شفوى بجد ماكناش خرجنا من الكليه اصلا
و فعلا كانت ايام كلها غم و قرف ازلى
احنا زى ما انتى قريتى لا سكاشن ولا محاضرات ... و طبعا الحركات القرعه بتاعت الدكاتره معروفه و عشان كده احنا كنا بناخد احتياطتنا برضه
شكرا على زيارتك السريعه و تعليقك الجميل و مستنى كبشه تعليقات تانى
انت تعرف وقت الامتحانات الواحد بيكون مهموم ونفسه الايام دى تعدى باى شكل من الاشكال
لكن بعد ما بتتخرج وتحس انك مسؤل على الاقل عن نفسك مش هقول عن اسرة لاننا فى مصر وصعب الشاب يكون اسرة الا وهو فى الستين على ما يحوش بقى من 150 جنيه اللى بيقبضهم كل شهر الواحد بيقعد يتنهد ويقول الا ليت ايام الجامعه تعود يوما
Desert cat
انا فعلا باكتب الذكريات كنوع من انواع النوستالجيا ... الفرق انى مش مفتقد الايام دى أوى عشان انا الحمدلله اصحابى لسه باشوفهم بانتظام و المعيدين و الدكاتره و العنال اللى بحبهم بانزل اشوفهم
يعنى تقدرى تقولى انى حاليا واحد حسنات الموضوع من غير سيئاته
انا بمتحن دلوقتى وبشوف بلاوى فى اللجنة والله
والغش على ودنو
البت المشمشيه
مصدقك وربنا ... ربنا يكون فى عونك و تخلصى على خير
إرسال تعليق