الخميس، 22 يناير 2009

احنا و الدروس


امبارح كنت مع نادر و امير زى ماقلتلكوا فى خمسه جد ... المهم من ضمن الحاجات اللى احنا جبنا سيرتها كانت الدروس ( الكورسات للناس الهاى و الناس اللى عايزة تعمل هاى ... الله يرحم جدودهم ) ... الحقيقه اننا فى اول سنه لينا فى الكليه كنا فاكرين ان الدروس دى كان اخرتها فى ثانوى بس بعد ما سقطنا فى سنه اولى اول عرفنا اننا من غير دروس مش هنخرج من الكليه ... و ده الحال بالنسبه لكل الكليات لانى ماعرفش كليه مافيهاش دروس
المهم انا هاحكيلكوا على شويه مواقف من اللى قابلتنا فى الدروس لان الناس تعبانه من موضوع الامتحانات فلازم الواحد يغير عشان الناس دى ما تنتحرش قبل ما الامتحانات تخلص
كنا بناخد درس عند دكتور كيميا بس دماغه ذريه و مشهور جدا و انا كنت على علاقه شخصيه وثيقه بيه من كتر ماقعدت فى الكليه و خدت عنده دروس فانتقلت من خانه الطالب الى خانه صاحب السنتر و ده مش كلام ده كان بجد لانى كنت واحد من قليلين ممكن ياخدوا مفتاح السنتر عشان لو عندنا دروس الصبح بدرى ... المهم فى يوم كنا بناخد درس و كنا مهيسين موت كنت انا و امير و بلال و دينا و هناء و فناجيلى حبيب الملايين و معانا بنتين من اللى كانوا بياخدوا السنه فى سنتها .. كنا اياميها فى سنه رابعه اول عشان امير كان معانا لانه ماعدش سنه رابعه ... المهم جت سيره الدكاتره بتوع الكليه ( بالخير طبعا ) و التصحيح و العمدا اللى مسكوا الكليه ، و احنا طبعا كناس ليها ماضى فى الكليه فاحنا كان عدا علينا عمدا كتير ... قعدنا مع الدكتور نفتكر العمدا اللى عدوا علينا من 8 و 9 سنين و البنتين قاعدين مش بيتكلموا لانهم لحقوا عميد واحد بس قبل العميد اللى كان موجود ايامها و الناس اللى احنا كنا بنتكلم عليهم هما بيقروا اساميهم على اللوحه الرخام اللى الكليه جايباها من فلوسنا عشان يكتبوا عليها اسامى العمدا اللى فى تاريخ الكليه ( زى ما يكون تاريخ الجبرتى مثلا ) ... و صاحبنا فناجيلى بيقول الدكتور " فاكر يا دوك احمد فؤاد باشا لما كان ماسك الكليه " .. البنتين بصوا ليه و قالوا انتوا من ايام احمد فؤاد باشا ، طبعا البنات من جهلم كانوا فاكرين اننا مثلا من ايام الملك ، مايعرفوش انه احمد فؤاد باشا ده عميد و ابنه معيد فى قسم فيزيا و مش عارفين ان كلمه باشا دى اسم مش لقب احنا خلعناه عليه ( و بمناسبه الالقاب ابقوا فكرونى احكيلكم على الاسامى الحركيه اللى كنا مطلعينها على الدكاترة - طبعا الكلام ده مش موجه ليكى يا عمتى ستيته لو بتقرى لانى انا مش عارف انتى مين و خايف تكونى واحده من الدكاترة اللى احنا كنا بندلعهم باسامى غير اساميهم ) .. طبعا قعدنا نضحك و الدرس اتقلب مسخره
موقف تانى نادر افتكره و البنات تدارى وشها او تحط منخل عليه لو هيتكسفوا ... نادر كان بياخد درس مع واحد .. المهم الواحد ده كانت غيته يقعد فى الدرس بالبوكسر السبعه .. المهم الاستاذ كان فى يوم بيشرح و كل ما يبص يلاقى ورك الواد فى وشه .. لغايه ما قاله يا بنى احترمنى شويه و قوم البس بنطلون عشان اعرف اكمل شرح ... الواد لبس بنطلون و رجع ... بعد الدرس ما خلص و نادر نازل يصور ورق مع الواد خد باله ان الناس كلها بتبص عليه هو و صاحبه ، بيبص لصاحبه لقاه قلع البنطلون و نزل بالبوكسر تانى و لما قاله عيب الواد رد عليه و قاله عيب ايه يا جدع دى منطقتى
انا و امير لما سمعنا الحكايه دى فطسنا على نفسنا من الضحك لان الحكايه دى فكرتنا بدرس كان عندى فى البيت و كنت انا و هو و بلال و فناجيلى و كان بيدينا معيد حبيبنا أوى ... المهم احنا قاعدين على الترابيزة و لسه هنبدا الدرس و فناجيلى قاعد مش مستريح و عمال يفرك على الكرسى زى الفرخه اللى عليها بيضه و مش عارفه تبيضها ... و فجاه لقيناه وقف وقال لا مؤاخذه يا جماعه اصل البنطلون لسه جديد و الحجر بتاعه ضيق .. و هب قام قلع البنطلون و كمل الدرس بالبوكسر بس كان بوكسر شورت مش سبعه
و على سيره البوكسرات و فناجيلى افتكرنا موقف كمان ... كنا بناخد فى يوم مراجعه ليله الامتحان فى مادة .. و كان السنتر زحمه موت لدرجه انه فى ناس قاعده على الارض بين الكراسى ... المهم كنا قاعدين انا و بلال و فناجيلى و امير جنب بعض و فناجيلى على الطرف و جنبه على الارض فى بنتين نعرفهم قاعدين ... و فجاه حسيت بحركه غير طبيعيه ، سألت امير قالى تعالى اقعد جنب فناجيلى و انت تعرف ... قعدت جنبه و فناجيلى وشه محمر باسأله مالك لقيته بيقولى على البنتين ان واحده فيهم بتقول التانيه " الحقى ده لابس بوكسر مخطط بالطول " .. انا باقوله طب هما عرفوا منين ان البوكسر مخطط بالطول ولا بالعرض قالى ان البنطلون اكمنه ضيق فالخياطه بتاعته اتفكت من الجنب حته صغيره و هما قعدوا يبصوا ... طبعا بعد الموقف ده و الضحك مانفعش نركز فى المراجعه و ربنا وفقنا و شلنا الماده دى ... بس الغريبه انه البنيتن دول نجحوا مع انهم كانوا مركزين على بوكسر فناجيلى اكتر من المراجعه .. بس ماعلينا و دع الخلق للخالق
شويه و امير افتكر موقف على الدروس و هو فى ثانوى ... كان قبل امتحان الفرنساوى ناس كلموا استاذ و قالوا له احنا عندنا مكان واسع و مجموعه جاهزة تعالى راجع معانا ... المهم امير بيقول المكان فعلا واسع بس فيه عيب واحد انه فى صورتين كبار جدا بالابيض و الاسود لاتنين امير قالى انه ريا و سكينه الحقيقين بالنسبه ليهم ملايكه و ان الاستاذ طول ما هو قاعد عمال يقول استغفر الله العظيم .. ايه القرف ده .. و ان الراجل مش عارف يشرح
و على سيره الدروس و السنتر اللى احنا كنا بناخد فيه افتكرت موقف جامد جدا ... انا على طول كنت باقعد جنب الدكتور من ناحيه ايده اللى بيكتب بيها عشان الناس ماكانتش بتحب المكان ده عشان مش بيشوفوا .. بس انا عشان طويل و عشان مش مهتم أوى بالدرس فالعمليه ماكانتش فارقه معايا .. و طول ما انا فى الدرس اقعد ابص على وشوش العيال و هى متنحه بتتلقى العلم .. المهم فى درس من دول قاعد على الكرسى و عامله مرجيحه و باضرب بعينى لقيت ينتن قاعدين جنب الدكتور الناحيه التانيه فى حاجه فى قعدتهم .. ركزت شويه لقيت واحده فيهم حاطه ايده على فخد التانيه و التانيه دى حاطه ايده على ضهر البنت الاولانيه و بتلعبلها فى شعرها ... طبعا ماينفعش اخد الموقف ببراءه و افترض ان واحده فيهم بتعمل مساج للتانيه او بتسرحلها شعرها ... نفضت للدرس خالص و بقيت متابعهم ، و هما لما خدوا بالهم انى بابص عليهم بصولى بصه معناها انت مالك ... و زودا اللى هما بيعملوه .. بعد كده اتعرفت على البنتين و اللى خلاهم يتكلموا معايا عادى انى مش فارق معايا اللى هما بيعملوه سوا لانه ده حريه شخصيه و ربنا هو اللى هايحسبهم مش انا .. و من فتره قريبه شفت واحده فيهم و سالتها على التانيه لقيتها تنحت كده و ردت عليا بعصبيه و قالتلى ماعرفش عنها حاجه و مش عايزة اعرف .. سألتها بتهريج تكونش خانتك و اتجوزت بصتلى و قامت معيطه فى الشارع .. انا قعدت اهديها و قالها معلش و تلاقيها اضطرت لكده و بعد كده مشيت و سبتها لانها كانت " مخنوقه و مش عايزة اتكلم على الموضوع ده " .. ده بالاضافه طبعا ان الناس ابتدت تتلم علينا و منظرى كان وحش
المهم كفايه مواقف دروس كده و هاكمل حكايات المره الجايه عن الدروس .......... يالا بااااااااااااااااااى

هناك 16 تعليقًا:

غير معرف يقول...

اول تعليق

حروح
اقرا وارجع اعلق see u later

Che يقول...

مستنى باقى التعليق يا حروف
see u later

ستيتة يقول...

دي اسمها مذكرات انحراف برجل جامعي زاويته 180 درجة
الطم على خدودي
ياواد لا دروس شافع ولا محاضرات نافع ولا كبريتيد هيدروجين سادد نفسك طب اعمل فيك ايه؟
ادخلك اوضة الجني بيجز؟
انت بتحضر دروس ولا بتقص علي اشكال البوكسر المختلفة
نفسي اشوفك ولو انا منك متشوفنيش شكلي ها ارجعك اولى تاني وأبدأ اديك ثقافة نافعة
تحياتي طبعا ليك ولشلة الأنس وبعد اللي انت قلته لازم تروح لبندق والزاوية الحمرااااااااااااا

Che يقول...

عمتى ستيته
والله اللى انا باعمله انى باحكى بامانه عن القائع اللى انا حضرتها و مسيرها فى يوم تبقى اجدع من الوقائع المصريه
جامده جدا حته اوضه الجنى بيجز دى ... على فكرة دول بيربوهم دلوقتى زى القطط و الكلاب
و بعدين الزاويه الحمرا دى جزء من كفاحى فى الحياة
نورتينى يا عمتى

البت المشمشية حلوة بس شقية يقول...

ربنا معاك فى الامراض دى كلها قصدى الدروس والمذاكرة

Che يقول...

البت المشمشيه
الحمدلله انا سبتها و ربنا كان معايا و لولا فضل ربنا عليا و دعا الاقربيين ماكنتش خرجت منها

Unknown يقول...

يا سلام!!!
انتا شكلك كنت بتاخد دروس في الصياعه واللفلفه مش العلم


بس الصحيح قصة البنتين اللي في الآخر من الآخر يا عمرو

ما شالله عليك متبع ومنتبه:)

Che يقول...

مياسى
والله انا ماحتجتش اخد دروس فى الصياعه و اللفلفه لانى اكتسبت الحاجات بالخبرة و الممارسه و بيتهايئلى ان الواحد يطلع صايع احسن ما يطلع اهبل
ثانيا علم ايه اللى انتى جايه تقولى عليه ... اقولك دفعتى كانوا اساتذه مساعدين فى السنه اللى انا اتخرجت فيها تقوليلى علم ...
ثالثا البنتين دول انا اعرف زيهم كتير معرفه شخصيه لانه مع رفضى لمبدأ اللى هما بيعملوه بس يفضل عندى كمان مبدأ ال tolerance و ال free well ... و طبعا لازم اقعد منتبه امال اكون قاعد قرطاس
اثلجتى صدرى ( حتى بالعربى الفصيح بعد الحتتيين الانجليزى اللى فوق ) و مستنى زيارات تانيه

Desert cat يقول...

تقريبا كلنا هذا الرجل
متخيلين ان الدروس اخرها ثانوى

Che يقول...

Desert cat
عندك حق بس تقريبا كلنا اتعلمنا بعد كده ان الدروس ماكانش اخرها ثانوى
نورتينى كالعاده

صيدلانيه طالعه نازله يقول...

انت كنت بتاخد كورسات و لا بتشوف بوكسرات الظاهر انك كنت فى الضياع خالص
و ياترى لسه فى الضياع و لا الزمن هدك
هههههههههههههههه
تحياتى

Che يقول...

صيدلانيه
انا كنت واخد المساله هزار ... يعنى كنت هاخلص الكليه هاخلصها و الحمدلله خلصتها
و الزمن مش هدنى ... بس انا كبرت شويتين عن زمان و بطلت اشوف بوكسرات خلاص
نورتينى

سمكه واحده يقول...

تقريبا انا بيته انهارده في مدونتك كل ما اطلع من مكان يودينا في مكان تاني ايه ياعم انت ده انت طلعت مشكله
ولون الصوره بتعتك كانت مخليياني متوجسه خيفه ادخل المدونه بس رنيت الجرس وخبطت لاء وايه عشت حياتي وكان معايا سندوتش كمان واكلت ولعبت وقفلت الباب وجريت ورحت
بجد مدونه جميله
وحجات تموت من الضحك
تحياتشي كل شويه اقول تحياتي تحياتي
سلامات بئي لحسن اتاخرت متقلقش قفلت الباب ورايا لحسن تتسرق هوششش

Che يقول...

سمكه هانم
فعلا انتى نشيطه جدا ... الو واحده والله تعلق على مدوناتى فى ليله واحده .. بس على فكره فى مدونه لسه ماعلقتيش فيها بس مش مشكله هاستنى شويه
و انتى بعد كده لا تخبطى ولا ترنى الجرس انا باسيب المفتاح فوق الباب ، افتحى و ادخلى على طول انتى برضه صاحبه مدونه مش ضيفه
عجبنى اوى تعبير متوجسه خيفه .. بقالى كتير ماسمعتوش
فرحان ان المدونه عجبتك و مستنى زيارتك على طول
تحياتى .... هههههه

SERVANT OF JC يقول...

ههههه
بوكسر مخطط بالطول!
ياعيني علي التركيز ..!!

الحقيقة أنا مخدتش اي دروس غير في سنة أولي بس .. أخدت كام حصة في مادة التكامل والتفاضل علي كام حصة تانين في الفيزيا. باقي السنين عدت من غير اي دروس لأني كنت من ضمن المجموعة البيولوجية والمواد فيها مكنتش صعبة إننا نفهمها علي عكس مجموعة العلوم الفيزيائية اللي محتاجة حد يفكلك الطلاسم اللي فيها.

المهم .. الحمد لله مطولتش في الكلية واخدت كل سنة في سنتها مع إني كنت خايف في أول سنة لما لقيت أكتر من نصف دفعة سنة أولي من الناس المدبلرين .. دا طبعاً غير قصص الأحباط اللي كنت بسمعها من كل مدبلر أقابله وكل واحد فيهم يقولك الكلية دمار والدكاترة مش عارف إيه والكلام ده هو.

طبعاً كل الكلام دا إكتشفت إنه كلام فاضي وفي الأخر اللي بيعقد في الكلية بيكون قاعد بمزاجه..

بجد يا تشي مدونتك دمها خفيف جداً .. وفكرتني بأيام الكلية...

تحياتي:)

Che يقول...

خادم المسيح
حكايه البوكسر دى كانت اكتر حاجه تنطبق عليها الادآب العامه اللى ممكن اقولها لان فى حكايات تانيه كتير بس مكتوب عليها تفضل سر و مدفون
و بعدين انا برضه كنت كيميا بيولوجى بس كنت باخد دروس ... الا بالمناسبه انت كنت دفعه كام و زقمك كان كام فى الكليه لان فى احتمال كبير اكون لحقتك لو كنت جامعه القاهرة
نورتنى