الأحد، 2 أغسطس 2009

هزار بوابين

البوست ده كان نزل على الفيس بوك بس جاله اوانه ينزل فى مكانه الطبيعى
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
كنت باتلكم مع حنون على المسنجر من كام يوم ، هى كانت متضايقه شويه .. المهم قعدت احكيلها على شويه حاجات من اللى اصحابى كانوا بيعملوها و هى فطست على نفسها من الضحك و قالتلى انى لازم اكتب الكلام ده فى بوست .... فلو طلع البوست دمه بايخ ابقى اعتبوا على حنون مش عليا
ليا واحد صاحبى اسمه ايمن و اللى بيقروا واحد جامعه عارفينه ... المهم ايمن ده ليه هوايه بايخه زيه كده ، هوايته انه يخض الناس .. و محدش بيسلم من هوايته الزفت دى .... مره بعد ما اتجوز و كان متعود يخض مراته لغايه ماهى زهقت من كتر الخناق معاه على الموضوع ده .... هى واقفه فى المطبخ عادى و بعدين سمعت باب الشقه بيتفتح و يتقفل ... عرفت انه جه ... استنته يجى يسلم ... مفيش ...... نادت عليه .... مفيش ........ عرفت انه ناوى على الخضه و الشر ... خرجت من المطبخ و هى واخده قرار انها مش هتتخض ..... تدور عليه فى الشقه مفيش .... المهم انها اقنعت نفسها انها كان بيتهايئلها و رجعت المطبخ .... شويه و راحت تجيب حاجه من التلاجه ..... الجزمه كان مستنى تحت الكنبه اللى فى الصاله و مد ايده مسك رجلها .... البت كان يجيلها سكته قلبيه .... هزار بوابين
الموقف التانى مع ايمن برضه ..... كنت عنده فى بيت ابوه انا و هو و انمار اخوه و مستنين الوكيل صاحبنا ايام الكليه .... المهم احنا متعودين لما نروح بنطلع لبس من الدولاب و نلبس هدوم البيت عشان القعده بتطول و يمكن توصل لبيات كمان .... جه الوكيل و ايمن دخل استخبى فى الدولاب ، انمار فتح للوكيل الباب و سلمنا و بوسنا ( قبل انفلونزا الطيور و الخنازير و الهم ده ) و سأل على ايمن قلناله بره ... المهم قال لانمار هاتلى اى حاجه البسها قام انمار قاله عندك الدولاب خش و هات اللى انت عايزه ..... الواد بيفتح الدولاب لقى ايمن بينطله منه و هو بيقوله عاااااااااااا ..... الواد اتنطر على السرير و فضل ساكت يجى خمس دقايق و بينهج و احنا هنموت من الضحك و مش معبرين الواد اللى اتسرع ده خالص ..... هزار بوابين
الموقف التالت و لسه مستمرين مع ايمن ...... كنت و انا بايت عندهم بعد حكايه الوكيل دى بكام يوم و كنا برضه احنا الاربعه هناك .... المهم اصحى الصبح على ايه .... صوت كلب بيهوهو فى ودانى و حد ماسكنى من منطقه حساسه .... طبعا انا قمت مسروع من النوم ..... خايف لمستقبلى يضيع .... الاقى الكلب ده ايمن و هو اللى ماسكنى ..... طبعا مش لازم اقول انى معرفتش انام تانى .... هزار بوابين
نسيب ايمن شويه عشان يستريح و نروح لوجدى و ده برضه من اعز اصحابى و موجود على واحد جامعه برضه ...... فى يوم طلعنا رحله ... فى الميه انمار عمال يغتت على وجدى و وجدى يقوله هتزعل منى .... المهم انمار فضل يغتت عليه ، و كل ما وجدى يجى يمسكه يروح انمار عايم بعيد .... لغايه ما مسكه ... و تخيلوا وجدى عمل ايه .... قلع الواد المايوه و رفعه لفوق .... ستر ربنا ان انمار كان ضهره هو اللى للجماهير ، و طبعا كل شئ انكشف و بان ... وجدى مش يكتفى بكده انما طلع و علق المايوه على خشبه على الشط ... طبعا احنا جبنا المايوه لانمار بعد كده و قلنا للناس ان انمار كان لابس مايوهين فوق بعض ( عشان المنظر العام و البرستيج و كده ) ... المهم بنت صغيره معانا سألتنا هو فى مايوه لون الجلد كده ... سكتنا و قلنلاها فى الاخر اه .... المايوه بتاع انمار .... هزار بوابين
بعد حكايه وجدى نرجع لايمن تانى ( استريح حبه حلوين اهو ) فى يوم كنت انا و هو قاعدين فى البيت بعد الجامعه ... و بعدين انمار جه و كان ناسى مفتاحه ..... ايمن السوسه قالى انه هيستخبى ورا التلاجه و يخض انمار .... انا فتحت لانمار ... سألنى ايمن فين قلتله نزل يجيب اكل ... و شويه و قلتله عايز اشرب يا انمار .... الواد قام يسقينى ( يعنى ياخد ثواب فيا و ده اللى وجعنى بعد كده ) ... هو بيفتح باب التلاجه من هنا و لقى ايمن بينطله من وراها و هو بيقوله الكلمه المشهورة بتاعته عااااااااااااا .... انمار قام رمى القزازه على ايمن و هبده بيها على دماغه .... هزار بوابين
نروح بأه لانمار المره دى .... العيال دى اكمنها بتلعب كارتيه فمتعوده على الهزار الغتت ... المهم فى يوم ايمن و انمار بيهزروا ... راح انمار حط صباعه فى عين ايمن و جابله تمزق فى القرنيه ايمن قعد مده يتعالج منه ..... هزار بوابين
فى تانى سنه لينا فى الكليه ، كنا كلنا مدبلرين انا و ايمن و الوكيل ، وجدى طلع سنه تانيه ( بس الحق يتقال استنانا فيها لغايه ماطلعناله ) و انمار كان لسه داخل الجامعه ... المهم كانوا عندى فى البيت من الصبح ى عمالين نلعب كوتشينه و نتفرج على افلام على الكمبيوتر ( اللى كان ايامها اختراع فى سنه 98 ) و قالوا عايزين نفطر .... المهم جبنا فول و طعميه و بطاطس و بتنجان و فلفل و مخلل و مشنه عيش عشان تكفى الوحوش اللى بتاكل و انا طلعتلهم حته مش صغيره ( بس من غير دود والله ) .... احنا كلنا من هنا و اتقلبنا نمنا من هنا .... المهم بعديها يجى باربع ساعات صحيت على صوت هبده جامده جنبى ... افتح عينى و اشوف ايه ... الاقى ايمن ماسك الوكيل من و سطه و بيرفعه و قام هبده على الارض و بعدين طلع على الكنبه و نط بكوعه على صدر الواد زى الهوب سلام بتاعت اونكل دوحه حبيب قلبى ... و الاقى ايمن فجأه بيثبت الوكيل و وجدى بيعد عليه 3 عدات .... ابويا الله يرحمه جه الاوضه جرى يشوف ايه اللى اتهبد لقى المنظر ده ... قام بصلنا و قفل الباب و مشى تانى ..... هزار بوابين
اخر حاجه بأه .... كنا فى يوم فى الكليه انا و وجدى .. المهم قابلنا صاحبنا عبد الشافى و ساعتها كنت انا و وجدى مروحين على عنده مش فاكر هنعمل ايه ... المهم عبد الشافى صمم يجى معانا ... عادى اهلا و سهلا .... رحنا بيت وجدى .... و وجدى ساكن فى التالت .. و عبد الشافى راح قعد على الكمبيوتر و طلع اسطوانه سيكو سيكو و قعد يتفرج بمزاج ( عرفنا سر انه شبط فى المجيه ليه دلوقتى ) ... المهم فى عز الانسجام حصلت هزة ارضيه خفيفه كده بس اكمننا فى التالت حسينا بيها .... عبد الشافى تخيييييين لدرجه انه لما خس وصل وزنه ل 140 كيلو ... الواد عايز يقوم يجرى و فجأه انحشر فى الكرسى و ينادينا عشان نشده قبل البيت ما يقع عليه و احنا نبص و نضحك مش قادرين نعمل اى حاجه تانى ..... بعد كده وجدى قاله عشان تبقى تتفرج على افلام سيكو سيكو تانى ، اديك كنت هتموت و قعد يقطم فى الواد ، و راح فضحه فى الجامعه ... عبد الشافى خدت قرار مهم ساعتها .. انه مش هيتفرج على افلام سيكو سيكو تانى ... عند وجدى تانى ابدا ..... هههههه .... هزار بوابين
اخر موقف النهارده خاص بيا انا .... انا عندى اخ واحد اصغر منى .... كل واحد فينا بينام فى اوضه لوحده ( شقتنا كبيره .... قروا بأه ) ..... المهم فى يوم نمت كده على الساعه 8 بليل عشان كنت تعبان موت ..... المهم صحيت على الساعه 11 كده و فضلت فى السرير ... اخويا دخل ينام و هو مش عارف انى صاحى ... و هوب النور قطع ..... انا قلت اهزر معاه شويه ... اتسحبت لغايه ما دخلت الاوضه عنده و قعدت عند اخر السرير ، و كل شويه اطلع ايدى ازغزغه فى رجله و احوشها بسرعه ... الواد يسحب رجله و شويه و يروح فاردها تانى ... اقوم مزغزغه تانى .... و فضلنا كده شويه ... لغايه ما لقيت نفسه بأه سريع و الواد زى ما يكون هيعيط ..... المهم انا عملت الحركه الفينالى بأه .... استنيته لما فرد رجله و قمت ماسكها بايدى جامد و انا بقوله الكلمه بتاعت ايمن عاااااااااااااا ..... الواد صرخ صرخه عاليه و انا قعدت اضحك و خرجت بسرعه قبل ما يزنقنى فى الاوضه و يخلينى اضربه ( مشوها اضربه ، مش اكمنه بيلعب كراتيه ... كراتيه على نفسه و احنا الحمدلله رجاله و لسه بصحتنا برضه ) ... المهم الواد فضل اسبوع مش طايق يبص فى وشى ولا يكلمنى ... مش عارف ليه .... مع انى كنت بهزر معاه ...... هزار بوابين
يارب اكون عرفت اخليكوا تضحكوا زى ما ضحكت حنون ...... سلام

هناك 26 تعليقًا:

*البت المشمشية *حلوة بس شقية * يقول...

اكيد مش ان ااول تعلي قوانتا عامل مورديشن صح

*البت المشمشية *حلوة بس شقية * يقول...

اة طلع صح اهو
ليه الولاد هزارهم رخم كدة وهزار بوابيبن فعلا
يعنى انا اقصا حاجة ممكن اعمها فى بنت
اخضها زى ايمن بلظبط
اعمل الحركات دى
العب معاها مصارعه بس كدة

الشعب لابد له من حكومه تشكمه يقول...

هههههههههههههههههههههههههه هزار بوابين فعلا

Che يقول...

شوشووووووو
اديكى طلعتى اول تعليق بجد يا شوشو
اقصى حاجه ممكن تعمليها مع بنت انك تخضيها زى ايمن و تلعبى معاها مصارعه و شايفه ان هزارنا رخم ... معلش يا شوشو ... اصل هزارنا هزار بوابين زى ما انا قلت
نورتينى يا شوشو

Che يقول...

شيمو
والله يا شيمو ده الهزار اللى سمحت بيه الرقابه انه يتنشر ... ههههههه
نورتينى يا شيمو

Unknown يقول...

على فكره تحفففففففه!!!

مش هزار جد مش عارفه هاد شو اسمو!!!

كيفك يا عمرو؟

مي يقول...

ههههههههههههههههههههههههههههههههههههههههههههههههههههههههههه
ههههههههههههههههههههههه
ايه ده ده بجد مش هزار ده موت ده انا تخضيت وانا بقرا فمابلك بقى عااااااااااا بس بجد بوست جامد جدااااااااا والله رووعة بجد
حرام عليك اللى بتعمله فى اخوك يا مفترى ولا اصحابك دول هههههههههه ربنا يستر ومحدش يموت التانى فيكو
هههههههههه
معلش هو يعنى ايه اسم انمار حب فضول بقى

انا عايزة اهزر معااااااك هههههههههههه نيهاااااااااا
تحياتى ليك يا قمر بجد انت عسل

سهيل ولى الدين علام يقول...

اول مره ازور مدونتك ،وعاجبنى هزار
بس ده مش هزار بوابين !!ده هزار جامد لكن هو ده اللى بيميز مرحلة الشباب
لكن لا انكر اننى ضحكت كثيراا ..
انا سعيد بهذه المدونه..لاننى من ساعة مادخلت المدونات ملقيتشى حاجه تضحك..
الاقى اللى عايزه ترجع بلدها وابوها مانعها واللى بتشتم فى ثورة يوليوولولا
الثوره كان زمانها بتخدم فى البيوت ولا
المدونه اللى بتكتب كلام فارغ وغير مترابط فيصفق لها المعلقون بانه هذا هو
الشعر الحديث والمدونه اللى بتعتبر نفسها زعيمة الثوره الجديده..
ولا..الخ..
مش عارف ليه فكيت كبتى عندك انت .يمكن لانك اضحكتنى كثيرا او حسيت انك قريب من
سنى !!مش عارف!!لكن انا استريحت هنا !!
طولت عليك كتير .سامحنى!!

sandy يقول...

تحفه تجننواانتوا نكته بجد فتست على روحى بموت فى همدونتك يا عمور واشكرلى حنون موت ويعنى على اصحابك فضحتهم

زهور الامل يقول...

ههههههههههههههه الله يجازيك يا عمرو خليتني اضحك بجد وانا كنت مضايقة جدا

ملاقيش عندك حبوب تخلي الواحد يفضل يضحك زي الاهبل علطول

تحياتي

سمكه واحده يقول...

ههههههههههههههه
بجد بجد خدني معاكوا
انا بحب كده مووووووووت ده انا ناس كتير بتزعل مني بسبب هزار البوبين ده
ياسلام يا عمور لو كنت ولد كان نفسي عشان يبقي معايا شله كده واهزر برحتي عارف انت البنات ورقتها ال ياخويا مش بتستحمل الهزار ده!!!! دلع ماسخ
فكنت بضطر طبعا اهزر مع اي مذكر عندنا في العيله او البيت
لدرجه اني لما مكنمتش بعرف اعمل مقلب كنت لو لقيت بابا نفسه كنت بعمل فيه مقلب اه وربنا وجدي كمان الله يرحمه وكل الناس تفتكر ياعمرو ربنا هيسمحني!!!!
فاكره مره ماما كانت عند تيته وبابا نايم لوحده وانا مش جيلي نوم وهو نايم ومشغل عندنا دفايه كده انتيكه معتز بيها اوي دخلت الاوضه بشويش اتسحب والنور مطفي وروحت شده الفيشه يقوم يشغلها ويحط الفيشه ارجع من اوضتي اشد الفيشه لحد بابا ما اتخض بس طبعا الصبح ولا بان عليه عيب بقي بابا يكلم ولا قال اي كلمه عشان هو راجل وانا مستنيه يكلم ولا يقول علي حاجه ابدا عيب يعني يبين انه اتخض ولحد الان عاوزه اقله

مره بردو اخويا كان في الحمام باليل فصلت نور البيت كله وقعدت اخبط علي الحمام وكنا الساعه 3 بليل
ماما بقي كل يوم في المطبخ ادخل عليها ابوسها وهي مش واخده بالها تروح مصرخه وتشتم فيا وتقولي بطلي بقي
وحجات كتير اسكت بقي كفايه رغي
بس بجد موتني من الضحك
في موقف بجد بزعل من نفسي اوي كل ما بفتكر وفي نفس الوقت اضحك
كان عندي خالتي نظرها ضعيف شويه وبتلبس نضاره فكنت انا وهيواقفه في البلوكنه
متخدني معاكوا شريك جديد؟
هتتبسطوا مني صدقني

Che يقول...

مياسى
ربنا يخليكى يا مياسى و الحمدلله انه عجبك
و ده مش اسمه هزار يا مياسى ... ده هزار بوابين ... و دى كلمه عندنا فى مصر دلاله عن الهزار البايخ و التقيل
انا كويس الحمدلله يا جميل ... ربنا معاكى يوم الاحد يا جميل و بالتوفيق ان شاء الله
نورتينى يا مياسى

Che يقول...

مى
عجبتنى جدا الضحكه الكبيره اللى دى يا مى
و على فكره ده هزار عادى ، يمكن تقيل شويه بس يفضل فى نطاق الهزار
و اللى انا عملته فى اخويا ده موقف من المواقف الكتير اللى انا عملتها سواء فيه او فى غيره
و طبعا يا قمر ممكن تهزرى معايا .. بس بلاش هزار البوابين ..... ههههههه
نورتينى يا مى

Che يقول...

سهيل ولى الدين علام
اهلا بيك لاول مره فى المدونه و يا رب ماتكونش آخر مره .... انا سعيد انك ضحكت
بالنسبه للى عايزة ترجع بلدها و ابوها مانعها انا شايف انك متجنى عليها ... من حقها انها ترجع بلدها ... و على فكره سنها شرعا و قانونا يخليها مسئوله عن نفسها مسئوليه كامله و اللى ابوها بيعمله فيها انه ببساطه بيتحكم فيها و البلد اللى هو فيها مدياله الحق ده و بلدنا بلد وسخه عشان منفضه للموضوع و بتقولك ده موضوع عائلى ... بالنسبه للى بتشتم فى الثورة انا مش عارف انت قصدك مين بالظبط ... كتير بيشتموا فى الثورة و انا مش بنكر فضل الثورة و دخلت فى نقاشات كتير مع ناس كتير من اللى رفضاها ... انما مسأله تخدم فى البيوت دى فالله اعلم بيها
اهم حاجه انك ضحكت فى المدونه ... و يا سيدى طول براحتك يعنى احنا ورانا ايه
نورتنى يا سهيل

Che يقول...

ساندى
عامله ايه يا دوك و ايه اخبارك و مختفيه من ساعه اسكندريه ليه
اهم حاجه انك ضحكتى و بعد الشر عليكى يا ساندى .... و على فكره سلمتلك على حنون ... اى خدمه
منورانى على طول يا ساندى

Che يقول...

زهور
يارب يجازينى خير يا زهور و الحمدلله انك ضحكتى
بالنسبه لموضوع الحبوب ده فانا بطلت الكيميا من زمان يا زهور ... ههههههه
نورتينى يا زهور

Che يقول...

سمكه
انا قعدت اضحك كتير من المقالب اللى انتى حكيتى عليها ... بس ليا سؤال ... انتى عملتى ايه فى خالتك فى البلكونه .... انا خايف لتكونى رمتيها ولا حاجه ، لانك مش موضحه اللى انتى عملتيه بالظبط
و طبعا تقدرى تنضمى لينا فى المقالب ... ابقى انى و مى الجناح النسائى لهزار البوابين
نورتينى يا سمكه

Che يقول...

مى
معلش يا مى نسيت اجاوب على السؤال بتاع معنى اسم انمار
بصى يا ستى ... انمار ده جمع نمير ، و النمير هو بئر الماء العذب او عين الماء العذب
اى خدمه يا مى ... درس عربى ببلاش اهو يا مى
منورانى يا مى

سمكه واحده يقول...

اه طب اتسني اقلك بس خلاص انا كبرت عقلت يعني محدش ياخد عني فكره وحشه اصل كل ما اختي تفتكر تضحك وتقولي انتي جباره والله حرام عليكي
بص يا سيدي ولون انا اترجعت في اخر حاجه اني احكيه لانه سخيف بس والله كنت صغيره(وش مكسوف)
خالتي كانت زي ما قلت عنيها ضعيفه شويه بتلبس نضاره يعني بتشوف بيها كويس من غيرها مش اد كده متقدرش تحدد ملامح من بعيد المهم
كانت واقفه عندنا جاره لينا بس بعيد شويه كام عماره بعيد وانا وهي وقفين في البلوكنه المهم الست كانت واقفه وبتشار لينا من بعيد فقلت لخاتلي طانط سهير تباي باي يا خالتو اعمللها باي باي فالمهم شورت لها وخلاص
الست دخلت وانا قاعده كل شويه اقلها خالتو طنط سهير بتعمل باي باي شورلها تقولي فين اقلها بتبايبي هه بسرعه عشان متزعلش تروح خالتو مشوره في الهوي وانا وراها واموت من الضحك وهي تحاول تغمض عنيها شويه كده عشان تشوف كويس وتشاور وانا اقلها بسرعه وكل شويه تعمل باي باي في الهوي وانا انسجم واضحك وزمان الناس كانت بتقول عبيطه دي بتشاور لمين ومره واحده بتبص وراها لقتني بضحك بتقولي هو كل ده وهي دخلت وانتي بتضحكي عليا عشان مش شيفاها يعني ؟وزعلت مني جداااااا وانا اتأسفتلها بس بردو كنت بضحك
ده مش هزار بوبين ده هزار غبي وقيلي التربيه والحيا
ربنا يسمحني كنت عبيطه بس كل ما افتكر اموت منى الضحك اصلك مش متخيل الموقف انا لو ملقتش حد ارخم عليه برخم علي نفسي
ولما ملقيش حاجه اعملها بليل اقعد افتح التيكتافون ولو حد بينادي علي البواب برد انا ولو اتنين بيكلموا ادخل في الكلام ومحدش يعرف بقي مين بيكلم واقول حاضر وانا جي اهو وحصلت كام مشكله بسبب انهم فاكرين ان البواب او حد من عنده بيقول حاضر ومش بيجيب اللي هما عاوزينه

Che يقول...

سمكه
بصى يا ستى ... الموقف بتاع خالتك بجد بايخ .... هههههههه .... حرام عليكى و الله ... بس عادى ، كلنا و احنا عيال بنعمل اكتر من كده كمان
الموقف بتاع الدكتافون ده بأه بجد يدل على انك بت أذى ... حرام عليكى يا شيخه ... تردى على الناس و تلبسى البواب فى الحيطه ... انا طبعا لو مكان جيرانكوا و انتى رديتى عليا على انك البواب و البواب ماجبش اللى انا عايزه اكيد هنزل اطين عيشته و مش هصدقه و لو حلفلى على الميه تجمد انه مردش عليا ... اصدقه و اكدب نفسى ..... هههههه
انتى كده معانا فى التشكيل العصابى خلاص يا سمكه
منورانى يا سمكه

Polka Dotted يقول...

LOOOOOOOOOL

ebtfakarni b noktet el s3eedi eli rama mrato mn el shebak tel3et aletlo eh el hezar el baye7' dah !!

especially 7ekayet eli beyhazar m3 a7'oh ata3lo el karaneya :D

a mero يقول...

ازيك يا عموره
قبل مااكتبلك انا عاوز اعرف اذا كان الكلام بيوصل ولا في مشكله لأن الكلام اللي بعتهولك علي خمسه جد ما ظهرش منه حاجه

a mero يقول...

طيب الحمد الله proplem solved .الصراحه انا احب الهزار بالكلام بس هزار البوابين انا ماليش فيه اوي وكمان انا ممنوع منه بأوامر مشدده من العائله وأقولك سر ان انا طلع عليّ اسم (أمير هزار المجانين) ودا كان بسبب 3 مواقف مقدرش احكي غير واحد بس . واحد قريبي ايام ما كان لسه متقدم لقريبتي في فترة الخطوبه وبعد ماخد علينا ابتدايهزر معايا هزار تقيل (وهو كان بيحبني الصراحه لغاية الموقف ده)وانا حذزته اني مش متضايق بس مشكلتي اني مبعرفش اعمل مقالب خفيفه لكن قاللي انه مابيهموش اعمل اللي انت عايزه فمره ةانا بزوره لقيته نايم فببساطه عملت خيط من الدم علي الأرض(ماء بنجر من الغدا) لغاية السرير الناحيه التانيه من الأوده وحطيت تحت الملايات كومة لبس كجسم وايد مطاط ووش فظيع من اللي بيتباعوا.وانتظرت بهدؤ في الصاله حتي سمعت صرخه مجلجله ولاداعي لذكر بقية الحدث بس كفايه تعرف انه لسه خايف مني لغاية دلوقتي وان عملتي كانت قربت تبوظ الجوازه نفسها(true story).
ومستني اسمع صوتك

Unknown يقول...

مواقف تضحك اهــ
بس صراحة تغيظ كمان
لانى اكره الخضايض وفيه
فرق كبير بين الخوف والخضة
انا ما بخافش الا من ربنا
والحمد لله بس فعلا بتخض
و
و
و
و
و
و
و
و
و
و
و
و
و
بخخخخخخخخخخخخخخخخخخخخخ

سمكه واحده يقول...

انا روحت في خمسه جد عشان
عشان عشان
ايه ياربي
يوه نسيت
ايون ايون افتكرت
عشان اقلك كل سنه وانت بخير وسعاده وفي رضا ونعمه من رب العالمين
وربنا يتقبل منك صالح الاعمال

رمضان كريم يا استاذ عمرو

hasona يقول...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهم علي النحو الصحيح
ورطب ألسنتنا بذكرك يا الله