الأحد، 28 يونيو 2009

راس البر و اتوبيس مصر للسياحه

اتكلمنا من بوستين على الرحلات و وصفتلكوا اول رحله طلعتها فى عمرى و كانت بتاعت راس سدر ... النهارده هاحكيلكوا على راس تانيه ( مش راس العبد للناس اللى غاويه نضافه ) انما راس البر
الحكايه ابتدت لما صاحبنا الوكيل قرر انه يطلع رحله عشان شاف ايمن و العيال بتوع المشابك بيطلعوا مصالح ازاى من ورا الرحلات .... المهم قالنا انه هيطلع رحله لراس البر و هيكون فيها ناس من عنده من منطقته اللى هى الوراق و اجدع سلام للجزارين و الجامع و الكراسى ... المهم احنا وافقنا ، و ايمن قاله انا هاجيبلك ناس بس اهم حاجه ان الاتوبيس يبقى كويس و الناس اللى هتتطلع تبقى كويسه عشان ايمن ميطلعش شكله وحش ... الوكيل عمل كده بالظبط و مكدبش خبر زى ما هتشوفوا .... طبعا احنا اصحاب العريس ، قصدى صحاب اللى مطلع الرحله مش بندفع او بندفع حاجه كده رمزيه ( و رمزيه دى مش خاله حد اعرفه بس لو انت تعرفه يبقى شغال ) امال صحاب ازاى
المهم ليله الدخله ... ييييي قصدى ليله الرحله رحنا عند الوكيل بليل عشان نظبط الفلوس و عشان نبقى اول ناس تركب الاتوبيس من اول الخط عشان ننظم الاماكن و مين هيقعد فين و كده ..... المهم على الساعه 6 الصبح كده اتفرج علينا ... انا و ايمن واقفين على الطريق عند المرور مستنين الاتوبيس اللى الوكيل قالنا انه زى اتوبيسات مصر للسياحه عشان يرفع راس ايمن قدام الناس اللى جايبها ... و كل اتوبيس يعدى علينا نقول مش هو , لغايه ما بأت الساعه 7 الا ربع و الاتوبيس ماجاش و نكلم السواق على الموبايل يقول انا واقف على الطريق و مستني و انا و ايمن مش شايفينه ... المهم الوكيل جه و قال ما الاتوبيس اهو يا جدعان ... فين يا بنى ( طبعا اتنين بقر مستنين يشوفوا اتوبيس زى بتاع مصر للسياحه ) يقولنا اهو ادامكوا ، طيب يا عم شاورلنا عليه او روحله كده يمكن احنا مش شايفين .... و اذ فجأه نشوف الاتوبيس اللى شبه اتوبيسات مصر للسياحه ... طلع اتوبيس تاتا هندى معمول فى الستينات .... انا قعدت اضحك ( مهو فى الاول و الاخر انا مش قايل لحد و ايمن اللى هيشربها لوحده لما الناس تهزقه ، صاحب بجد انا مش كده و صاحب صاحبى ) و ايمن يقول لعمرو هو ده الاتوبيس ، يقوله اصل انا خفت اقولكوا مالقتش غيره ماتجيبش حد ، و معلش يا ايمن ، و اهم حاجه الناس و الصحبه و اللمه .... ايمن قاله بس الناس يبقوا كويسين يا وكيل .... قاله رقبتى يا ايمن عيب عليك ... و طبعا الوكيل طلع صادق فى حكايه الناس
جم الناس و كان فيهم ناس نعرفهم و قلنا كده فل و اتفقنا اننا عشان نتجنب المشاكل هنقسم الاتوبيس نصين عشان الناس ما تختلطش ببعض و نريح نفسنا ... طبعا ايمن عرضها و قعد يقول الناس ان الاتوبيس بتاع مصر للسياحه .... انا مهما ضحكت فى حياتى مش هيبقى زى اليوم ده كل ما اشوف الصدمه على وش حد من اللى طالعين و يبص لايمن و ايمن نفسه يموت دلوقتى بس عشماوى مش عايز يجيله ، و ممكن و هو طالع يرقعه كلمه زى ما وجدى عمل و مازال بيعمل لغايه دلوقتى مع ان الرحله دى كانت من 9 او 10 سنين
المهم الناس ركبت و اترستقنا لقينا الاتوبيس ماشى براحه أوى .. يا عم السواق الناس ركبت و محدش هيركب تانى ، يقوم الاسطى يقولك دلوقتى يسخن و يجرى و يبقى اكسبريس ... يا عم ايه هو اللى يسخن هو تليفزيون ابيض و اسود ، يقولك اه والله بس صبركوا بالله و بعدين احنا اليوم معانا لسه طويل ، ماشى يا عم مش مستعجلين
شويه و ابتدينا نغنى و ناس ترقص طبعا مع الحفاظ على الخط الوهمى اللى فى نص الاتوبيس اللى فاصل بين المعسكرات ، بس الشهاده لله كان الناس اللى تبع الوكيل معاهم حته بت لهلوبه و شويه و لاحظنا ان الناس عندنا ابتدت تهيس و الناس فى النص التانى زى الفل ... ايه بأه اللى بيحصل .. و نبص و نشمشم , و ان ان ان تششششششش ..... واحد من الشباب الحلوه من عند الوكيل بيشرب سيجارة بانجو .... عادى يعنى و هيييييه رحله و هاف فن .... وجدى اتحمق ( و هو على طول اللى بيتحمق ) و قاله عيب يا وكيل و احنا معانا حريم ( يعجبك الحس بتاع سى السيد اللى عند وجدى ) بس الحقيقه انه برضه كان بيخاف يتسطل ، اصل دماغه خفيفه ..... الوكيل فعلا قال الشباب عيب يا شباب , و ابقى اشربوها على الشط و حتى هوا البحر يعمل احلى شغل و يمكن نغرق بعض بعدها و احنا بنهزر بعدها و هتبقى احلى عيشه ... الشباب عجبتهم فكرة انهم هيغرقوا بعض كنوع من انواع الهزار و طفوا السجاير
المهم رقصنا و غنينا و ابتدينا ناكل فى السندويتشات و لسه ماوصلناش ... ايه يا عم الاسطى ... اييييييييييه الصبر مفتاح الفرج ..... و صبرنا .... بلاد تشيلنا و بلاد تحطنا و العيال الصغيره ابتدت تنام و الناس الكبيرة ابتدت توطى صوتها ( عشان العيال ماتصحاش ) .... و فيييييييين بعد اربع ساعات و نص وصلنا ، و قعدنا ندور على شط و فى الاخر نزلونا فى شط 101 .... ناس كتير و زحمه زى ما نكون فى شم النسيم او عيد الفلاح
المهم نزلنا نعوم و مش هاممنا حاجه ... و فجأه لقيت ايمن مش بيعوم .. عمال بيطلع ايده على وش الميه و كل شويه يعمل كأنه بيعوم ... ايه يا بنى انت اتهبلت ولا بتعوم و انت فى مكانك ، قالى تعالى قرب و انا اقولك ... انا بصراحه قلقت بس قلت لما اقرب ... قلتله فيه ايه .. قالى انا بازيح اللى انت شايفه ده .. و ده كان عباره عن مخلفات بشريه انا مش هاقول ايه هيا بس اكيد انتوا خمنتوها ... و فجأه حسيت بالقرف انى نزلت البحر اصلا و غطست فيه و جايز ميه دخلت فى بؤى و كرهت ايمن موت عشان قالى ... المهم بعد السيره المعفنه دى شويه و كلنا خرجنا من البحر ( عشان تعبنا من اننا نقعد نزيح فى الحاجات اللى بتهجم علينا مش عشان البحر مش نضيف ) .... طبعا طلعنا قعدنا على الشط و لكم ان تتخيلوا الشط عامل ازاى مدام شكل البحر كان كده ، فى الاخر البحر هيرمى المصايب بتاعته دى فين ... نسيت اقولكوا ان ايمن بما انه مدرب كراتيه كان جايب العيال الصغيرة اللى معاه فى التمرين عشان يكمل عدد الرحله ... شويه و لقينا بنت صغيره جايه لايمن و تقوله يا كابتن ايمن احنا مش لاقيين احمد .... كلنا قمنا ، ده كده عيل تايه و دخلنا فى قلق ، هى رحله باينه من اولها ..... المهم قعدنا ندور على الواد و مشينا و فين بعد ساعه و نص كده لقيناه على شط تانى بعيد ... يا ابنى انت ايه اللى جابك هنا الواد يعيط و ميردش ... يا بنى حد عملك حاجه برضه يعيط و ميردش ... شويه و هدى و قالنا انه قعد يمشى لغايه ماوصل الشط ده و بعدين ملقاش حد من صحابه قعد يعيط و الناس قعدت تدور على اهله فاكرينه عيل تايه ( و هو فعلا عيل و كان تايه ) و طبعا لما ايمن وصله الناس غسلته باعتبار انه اخوه الكبير ( استحمل كتير ايمن فى الرحله الشؤم دى ) .... المهم كان كده فل على اليوم ... شط معفن و بحر اكتر عفانه و عيل تايه و اليوم من اوله كان باين من الاتوبيس اللى شبه اتوبيسات مصر للسياحه .... قلنا احنا نمشى بأه ... و كان ختامه مسك ..... بنت من اللى معانا قالت انها مش لاقيه هدومها ... يا بنتى دورى كويس ... مش لاقياها ... طيب هنرجعها ازاى لاهلها و هى مبلوله كده .. المهم محمد حجاج صاحبنا قال انه عنده شورت زياده ( اصله راجل نضيف .. بيجيب شورت يلبسه فى الميه و شورت تانى لما يطلع عشان مايقعدش مبلول ، مش زى العاهات اللى يعرفها .. احنا بنقعد بنفس الشورت و ممكن كمان نروح بيه .. عادى ولا يهمنا ) .. طيب هنلبس بنت شورت ازاى ، قالك ده الحل اللى عندى ، المهم قلنا امرنا لله و البنت لبست الشورت بس عشان فرق الطول و الحجم كانت كأنها لابسه بنطلون برمودا و كانت اول بنت فيكى يا مصر تلبس برمودا قبل حتى ما نعرف اسمه .... طبعا قامت مشكله و الوكيل فتش شنط الناس اللى معاه عشان لبس البت و طبعا ملقاش حاجه ... بس سيبكوا ، الناس ساعتها كرهونا بجد و لو طالوا يموتونا كانوا عملوها ..... قلنا هى اتعشت كده و نروح بأه ... و طلعنا للعذاب تانى اللى اسمه الاتوبيس ، بس الناس كانت اتهدت و نامت ... و شويه جم و قالوا عايزين نجيب مشبك ، مينفعش نروح راس البر و مانجيبش مشبك .... عم الاسطى وقف ساعه و نص لغايه ما اشتروا المشبك ... تقريبا جابوا مشبك للوراق كلها و القرى المحيطه بيها كمان ، و شويه و رجعنا استأنفنا الرحله ... احنا كنا قاعدين فى النص الورانى و انا كنت قاعد على الكنبه الورانيه و باتكلم مع واحده عشان احنا الاتنين مش بنعرف ننام فى حاجه بتمشى و فجأه لقيت دخان طالع علينا من الفتحه اللى عند الموتور ... يا عم الاسطى الاتوبيس بيولع ... و الناس تصرخ و العيال تعيط و الراجل وقف على جنب و قالنا لا ده عادى .. ده الاتوبيس سخن شويه ... يا عم هو مشى اصلا عشان يسخن ... قالك انا مضطر امشى براحه و ربنا يستر طريقنا.... قال يعنى كنا راكبين صاروخ و احنا مش عارفين ... بس بعد ما مشى بالراحه عرفنا النعمه اللى احنا كنا فيها .... احنا جينا من مصر لراس البر فى اربع ساعات و نص ... رجعنا بأه فى تسع ساعات ... اه والله .. مش بقولكوا كانت رحله عسل ... بعد الرحله دى قعدنا يجى شهر مانكلمش الوكيل و مش طايقين نشوفه اصلا ده غير اننا بنعايره بالرحله دى لغايه دلوقتى ... بس رحله و عدت و جت بعديها رحلات كتير ... بس ده للمرة الجايه ..... سلالالالالالالام

هناك 16 تعليقًا:

دون كيشوت يقول...

عمرو انت مش جبتوا بالفلوس كل واحد طقم من المصلحه اللي عملتوها ولا دي كانت رحله تانيه

الشعب لابد له من حكومه تشكمه يقول...

ههههههههه هموووووت من الضحك ربنا يسعد قلبك زى مخلتنى ضحكت دلوقتى وفكرتنى باحلى ايام انا عيشتها تقريبا حصلى نفس اللى بتحكيه بس انا كنت من ضمن الناس اللى اضحك عليهم لدرجة انى شاكه انكو الثلاثر المرح اللى طلعنا القناطر فى باخره (واخد بالك من باخره دى هههههههههه)
بس تعرف بجد بتكون احلى ذكريات.
وبعدين انا افهم ازاى البلوج ده انا مدخلتوش قبل كده وازاى مش عندى فى الريدر دى مهزله...

Che يقول...

ايه يا عم نادر
مش دى الرحله بتاعت الاطقم و بطل سياحه بأه
نورت يا عم

Che يقول...

الشعب
انا لازم الاقى اسم اقصر من ده شويه عشان اندهك بيه
المهم انا فى قمه السعاده عشان انتى ضحكتى .... و بالنسبه لرحله القناطر ماكناش احنا اللى طلعناها ... مع اننا طلعنا فى باخرة برضه ( خدت بالى اهو ) ... و هى فعلا احلى ذكريات ، طبعا باستثناء الجزء بتاع البحر ... ييييييييععععع
و يا فندم يشرفنا ان البلوج يدخل فى الريدر جنب اخواته
نورتينى يا فندم

magi يقول...

على كده العيال الى بيطلعونا الرحلات طلعوا اخر احترام صحيح الاتوبيس مش بيكفى كل الناس وناس بتقف وكده...عادى جدا....وانا واصحابى بنعد ندعى عليهم بس بجد دول طلعوا ملايكه

Che يقول...

ماجى
و مين قال ان الاتوبيس كان الناس اللى فيه كلها قاعدين ، طبعا كان فى ناس واقفه ... ماتبقاش رحله يا ماجى فى مصر لو ماكنش فى ناس واقفه فى الرحله
نورتينى يا ماجى

مياسي يقول...

هههههههههه رحله من الاخر جد

بس في سؤال محيرني:

شو هو المشبك اللي كان لازم ما تروحوش بلاه؟!!

Che يقول...

مياسى القمر
فينك يا قمر طولتى الغيبه المرة دى
طبعا يا مياسى رحله من الاخر امال يعنى احنا بنلعب
و المشبك ده يا ستى نوع من انواع الحلويات اللى مش موجوده غير فى مصر .. بتكون بتاعه مدوره و غرقانه سكر عسل و بتلزق و حاجه هم
نورتينى يا قمر و متغيبيش كتير كده

Haytham Alsayes يقول...

ههههههههههههههه حلوة والله اسلوبك جامد ربنا يكرمك

Che يقول...

هيثم باشا
منورنى لاول مره و ان شاء الله ماتكونش الاخيره ... و شكرا على تعليقك الحلو و ربنا يتقبل دعوتك ان شاء الله
نورتنى يا باشا

سارة نجاتى يقول...

بجد هيست معاك خالص ههههه
ده ندهت أخويا يقراها

أنا بقى جو الكلية بتاعتى يضيف معنى جديد لكلمة ملل فى القواميس

Che يقول...

سارة
تعليقين فى يوم واحد ... كده كتير عليا
الا بالمناسبه و من قبيل الفضول .... اخوكى قال ايه لما قرا
يا ترى انتى كليه ايه اللى جوها جميل كده ؟؟
نورتينى يا جميل

norahaty يقول...

الله ياجازيك ياشى
فطستنى من الضحك
ياخبر ابــــــــــيض!
دى ولا رحلة فى الادغال
متهيأللى انكم بطلتم
رحلات خالص بعد المغامرة دى!
ربنا يسعد قلبك زى ما ضحكتنى
على الصبح.اقولك نكككككككككتة
انا بقى رد جميل :ماشــــــــــى؟
بيقولولك بعتوا 2 طن ادوة للصومال
هدية ردتها الصوال تانى! ليه؟
اصلها بعد الاكـــــــــــل.
(اوعى ما تضحكش ازعــــــل
واقعد اعيط زى العيل التايه ده)

Che يقول...

نورا
انا سعيد جدا انك ضحكتى على البوست ... و طبعا يؤسفنى اقولك اننا مبطلناش رحلات بعد الرحله دى لاننا اثبتنا ان الانسان كائن مش بيفهم
بالنسبه للنكته انا عندى رد عليها ... ههههههههههههه ... المفروض اننا نخلى عندنا نظر ... يعنى بدل مانبعتلهم ادويه بعد الاكل نبعتلهم الادويه بتاعت عسر الهضم
ادينى ضحكت عشان متعيطيش اهو زى العيل التايه اللى بالمناسبه مبقاش عيل و بأه اطول منى
نورتينى يا نورا

norahaty يقول...

السرور والنور
حصلوا لى انا
بردك الامور
طيب اين المزيد ياشى

Che يقول...

نور
انا ليا مدونه تانيه
www.5msagd.blogspot.com
هتلاقى عليها بوست كان المفروض ينزل هنا بس الظروف خلته هناك ... اسم البوست وجدى و مشروع اللانجيرى و عذرا اذا كان الاسم بايخ بس المضمون لذيذ او على الاقل الناس قالت كده
نورتينى تانى يا نور لانك اسم على مسمى