الأحد، 13 سبتمبر 2009

وجدى ابو الدود

رجعنا مره تاننيه مع وجدى مشاريع فى مسروع من مشاريعه اللى مش بتخلص ..... كنت آخر مره اتكلمت انى هاحكى مشروع جديد من مشاريع وجدى ، بس الصراحه كنت محتار اختار انى مشروع اتكلم عليه ...... و بعد طول تردد اخترت انى اتكلم على مشروع وجدى مع دود القز
البدايه كانت ان وجدى زى اى شاب مصرى يعرف حكايات كتير عن دود القز .... بس كل الشباب دى بما فيهم انا منعرفش حد معرفه شخصيه عمل مشروع الدود ده و نجح معاه ولا المشروع ده خرافه زيه زى حكايات هركليز و زينا مثلا او الشاطر حسن و كل الحكايات اللى انت بتسمعها و انت صغير ... و برضه و انت كبير و متعرفش اذا كانت الحكايات دى حقيقيه ولا هجص .... زى الفيلم المشهور جدا فى اوساط الشباب اللى كان بين المطربه المعروفه و البطل الراحل اللى اخترف ادوار الشر ..... كلنا سمعنا عن الفيلم ده و كلنا سمعنا عن اشهر عباراته .... كرباج ...... المهم نسيبنا من السيرة دى و نرجع مره تانيه لوجدى و دوده
فى يوم كنت قاعد مع وجدى و قالى انا هبتدى مشروع جديد .... انا عملت نفسى اتفاجات ، مع انى من جوايا كنت عايز اقوله و ايه الجديد يا عم وجدى .... ما انت طول عمرك بتعمل مشاريع و طول عمرها المشاريع دى بتبوظ .... يعنى مفيش جديد .... بس صاحبى و لازم اقعد اسمعه ... قلتله اطربنى ... غنى يا وحيد ... قالى تسمع عن دود القز ... و وجدى كل ما بيتدى اى مشروع لازم يدخل عليا نفس الدخله .... تسمع عن كذا ... أل يعنى الواد بيقولى حاجات انا معرفهاش ... زى ما اكون اتولدت امبارح او لسه مثشرين امى من عليا .... قلتله اه يا عم وجدى سمعت عن الدود و عن القز و حتى انا سمعت انهم بيطلعوا منه حرير ، الا صحيح الكلام ده يا وجدى ... قالى اه صحيح ... قلتله سبحان الله ، و يخلق ما لا تعلمون ... ماشى يا عم وجدى قول بأه انت نويت على ايه ... قالى تسمع عن محمد خالد .... و محمد خالد ده واحد من اصحاب وجدى و اكتر واحد وجدى بيستلهم منه مشاريعه ... و سبحان الله دايما فى كل مشروع لازم يطلع لوجدى خازوق كده و بعد ما المشروع يبوظ يقولك اصل الغلط كان فى معرفش ايه ، و انا لما اعمل المشروع المره الجايه مش هغلط نفس الغلطه .... و عمره ما عمل المشروع مرتين اصلا .... وجدى اجدع واحد يبتدى المشاريع و مايكملهاش ولا يعملها تانى ..... المهم قالى انا هنزل وزاره الزراعه اجيب اليرقات بتاعت الدود من هناك ... و العلبه بتمانيه جنيه و الدود اللى بيطلع منها بيطلع حرير يجى بزليون جنيه كده .... و انا اقوله يا عم وجدى لو بيكسب كده كنت هتلاقى البلد كلها دود .... يقولى بس هما بيغلطوا .... انما انا راجل خريج علوم ... و بعدين يابنى احنا خدنا الحاجات دى فى الكليه ... و انا معرفش سألت دكتور مين فى الكليه و قالى هعمل ايه .... و بعدين عيب على واحد خريج حشرات زيك يقول كده .... انت المفروض درست الحاجات دى فى القسم بتاعك ..... و انا اقوله يا عم انا فاشل .... ماتقسشى اى حاجه عليا يا بنى ..... يابنى انا ادونى الشهاده بالتزكيه اصلا عشان انا
دفعه العميد .... يقولى بس انا عارف هعمل ايه .... قلتله ربنا معاك يا وجدى ... و خدتنى الايام و اتشغلت شويه و عدت ايام و رجعت ايام و رحتله البيت فى يوم عشان كان قالى تعالى اتغدى معايا النهارده ، قلتله خلاص على معاد ... و لما رحت مافتحتش بؤى بكلمه عن موضوع الدود ده لانى اتعلمت مع وجدى انى ماستعجلش على رزقى .... و وجدى ماخيبش ظنى .... انا يادوبك لسه بقعد و بقوله عامل ايه .... قالى تعالى اوريك الدود .... انا افتكرت ان الدود فى حته بعيده ... قلتله طيب اخد نفسى من السلم و بعدين اجى معاك ... قالى ده هنا يا عم .... قلتله فين .... قالى هنا فى الشقه قلتله هو فيه دود يتربى فى الشقق يا وجدى .... انت بتشتغلنى ... قالى يا جاهل الدود بيتربى فى اى حته .... قلتله تعالى ورينى يا عم الدود اللى بيتربى فى اى حته ده يا عم العلامه ... المهم و انا معدى فى الطرقه اللى بين الاوض و الحمام لقيت شبكه من اللى بتبقى موجوده فى المصايف التروبيكال و كده ... و اللى مش عارفها هى نفس الشبكه اللى كانت موجوده فى فيلم تحمد حلمى و غاده عادل فى الفيلا اللى كانت فى مارينا ... بس انا محطتش فى دماغى .... لقيته مكمل بيا على اوضه النوم .... لا يا وجدى ... اعقل يا مجنون .... انا صحيح صاحبك بس مش للدرجه دى ... و دخلت الاوضه و شفت .... و يا هول اللى شفته على رأى يوسف بيك وهبى الله يرحمه .... لقيت الدود على السرير بيرعى و بيتعايش .... قلتله يا وجدى انت بتنيم الدود على السرير و بتنام انت و المدام على الارض ولا ايه ... قالى لا يا جاهل ، انا بس بشيله من الشبكه كل يوم عشان مايخنقوش بعض و اشوف الميت فيهم و اشيله ... قلتله شبكه ايه .... قالى اللى بره فى الطرقه ... طبعا انا معلقتش ... يمكن الدود بيتربى كده و انا مكنتش بحضر فى الكليه لدرجه انى افتكر الدود بيتربى كده ولا لا .... المهم شويه و رجعنا قعدنا بعد ما اتفرجت على اولاده اللى منيهم على السرير و رجعنا الصالون نتكلم .....و شويه و مراته جت قعدت معانا ... بقولها ازيك ... قالتلى انت شفت الدود قلتلها اللى على السرير ... قالتلى اه ..... قالتلى الدود ده بعد كده لما اجى انام الاقى دوده نسينا نشيلها والاقيها سارحه فى شعرى ، ماشيه عليا ، كده يعنى ... قلتلها ربنا معاكى .... ضحكت و ماعلقتش .... شويه و قلت لوجدى و يا ترى يا وجدى بتأكله ايه ... قالى المدام بتجيبله خس عشان يكبر و يتغذى كده و يدينا حرير .... قلتله ربنا معاك يا وجدى و يوفقك كده و تلاقى المكنه طلعت قماش .. قصدى الدود طلع حرير .... و مشيت روحت .... و بعد شويه ايام كتير عدت .... رجعت قابلت وجدى تانى ... و برضه فضلت ساكت و مسألتش على حاجه .... و تانى برضه ماخيبش املى ... قالى اسكت مش الدود مات .... قلتله كله ... قالى اه ... قلتله ولا دوده اتفضلت ... قالى كله مات .... قلتله ولا واحده فقست ، قصدى ولا واحده طلعت حرير ... قالى كله مات ... كان ممكن اغتت عليه و اقلب عليه المواجع خصوصا و انا شايفه زعلان .. بس برضه صاحبى ... قلتله معلش يا وجدى ... بس ايه اللى موتهم كلهم ... قالى فى يوم لقيته كله ميت ... قلتله من ايه ... انا الصراحه افتكرت مراته حطتلهم سم ولا حاجه انتقاما من الدود اللى كان بيمشى عليها .. قالى لا ... تقريبا الحراره بتاعت الصيف هى اللى موتتهم ... ساعتها معرفش ليه افتكرت موضوع الارانب و الصيف ... قلتله معلش يا وجدى .... و لقيت مراته زعلانه جدا .... بقولها انتى زعلانه ليه ... انا افتكرت انك هتعملى فرح عشان الدود مات ... قالتلى لا .. انا زعلانه ... كنت ابتديت اتعود عليهم ... قلتلها معلش ربنا يعوض عليكى ... ضحكت و برضه ماعلقتش ... و دى كانت نهايه مشروع الدود مع وجدى ... بس مشاريع وجدى ماخلصتش .... و وجدى اثبتلى انه لا يأس مع الحياه و لا حياه مع اليأس و ابتدى مشروع تانى ... بس ده موضوع تانى .... سلام

هناك 23 تعليقًا:

مي يقول...

انا اول دودة ولا ايه لا قصدى اول تعليق

Che يقول...

مى
انت يا باشا مش أول دوده ... انما اول فراشه ... اصل الدود ده بيطل فراشات بعد كده
دايما سباقه بالخير يا مى
منورانى على طول يا مى

مي يقول...

مااااااااااااشى عامل مودريشن ايه الغلاسة دى
عااااااااااااا مش لاعبة
بجد صاحبك وجدى ده تحفة ثانيا انا معرفش حاجة عن دودو القز ههههههههه
ومنيمهم على السرير ههههههههههههههه
لابجد مفيش من وجدى ده اتنين ده حنين اوىىىىىىىىىىىىىى وكمان شبكة هو كده يحب يمرجحهم طيببببببب اوىىىىىىىى شفت بقى

ولا مراته دى كميلة انا لو مكانها كنت اطلقت ال بيتحركوا عليها يالهوىىىىىىىىىىىىىىى
وانت يا شجاعتك ازاى دخلت وشفت المنظر
لا بس بجد انت عثل بجددددددد بس عيبك الوحيد وجدى هههههههههههه
هو وجدى مش عايز يعمل مشروع تانى اصلى بفكر فى مشروع كده بس متخافش هنصص معاك
نيهاااااااااااااااااا بس انت هات وجدى بس نيهاااااااااااا
تحياتىىىىىىىىىىى يا قمر

Che يقول...

مى
المودريشين ده انا عامله من زمان ... أل يعنى مش واخده بالك ان خمسه جد كمان كده .... ماشى
و بعدين بلاش العاااااااا ... انا ماستحملش
و طبعا وجدى ده مفيش منه اتنين .... البلد مستحمله واحد بالعافيه ... على فكره فى بوستات تانيه هنا على واحد جامعه عن وجدى و مشاريعه ... تقريبا اتنين او تلاته مش فاكر ... هيعجبوكى جدا
و طبعا مراته دى كميله ... بس متقوليش كده ادامها لتصدق ... هههه
ربنا يخليكى انك شايفه انى عثل ... ممكن عثل اثود ... هههههه .... و بعدين وجدى ده مش عيب ... ده قدر
بالنسبه لوجدى انا ليا كتير مش بسمع منه حاجه ... بس وجدى عنده استعداد يعمل اى مشروع مع اى حد ... و بعدين يا ستى انا مش عايزك تنصصى معايا .... اكسبى انتى الاول و بعدين ندور على حكايه التنصيص دى
منورانى يا مى

الشعب لابد له من حكومه تشكمه يقول...

هههههههههههه همووووووووت مش قادره حتة مشروع.
وكله كوم والدود على السرير منظر مقزز مهز قز باه لازم يقزز:))
بس مفهمتش برضه الشبكه دى لازمتها ايه؟ يعنى بيوريهم الخيوط شكلها ايه فيمشوا عليها يعنى ولا ايه ولا بيغريلهم جم من السرير للشبكه يعنى:))

Che يقول...

شيمو
معرفش انتوا شايفين انه منظر مقزز ليه ... يمكن عشان انا دراستى كانت الحاجات دى فمش بحس نفس الاحساس ده
الشبكه يا ستى عشان يخليهم يباتو فيها ... مش يوريهم خيطوها ... اصل وجدى يحب يدلع الدود بتاعه موت ... كل الناس اللى اعرفها بتنيم الدود فى صناديق وجدى جايبله شبكه تروبيكال ينيمهم فيها
منورانى دايما يا شيمو

BaTaBeeT يقول...

dod azz !!! LOOOL

ana de7ekt de7k wana ba2ra 3an el masharooo3 :D

kan mn a7ad a7lami bardo eni arabi dood azz... w gebt etnen w mato :( m3 eni kont ba2akelhom b 2eedy w batabtab 3alihim (da begad walahy :D


w howa beynam makan el dood !!!

w sanya !! el 3alem el keber bey2akel dood el azz 7'ass ?:D
ma akid mato 3shan keda !

rabena yeshfi :D

زهور الامل يقول...

هههههههههههه
ايه ده هو لسة في حد بيربي دود
انا اليومين دول بربي صراصير علشان بيقولوا انها بتنتج حمة التيفود اللهم احفظنا

بجد انت مستحمل وجدي ده ومشاريعه دي ازاي

الله يكون في عونك

اه من الحق
ليه المقدمة ملهاش علاقة بالبوست

انا كنت مستعدة للعياط والنواح بس ربنا ستر في اخر لحظة

ابقى سلملي على وجدي

تحياتي

*البت المشمشية *حلوة بس شقية * يقول...

حرام عليك يا عمرو
بجد
عيى وجعتنى على ما قريت
ابقا سيب مسافات كدة وروق البوست عشان بجد النظر على ادنا

سهيل ولى الدين علام يقول...

ايه اللى بتقولوه ده ياعم؟؟دود ايه وفرشات ايه؟؟انا خريج زراعه..ويوم ما كلمت دكتور الصناعات الغذائيه
على موضوع دودة القزوتربية الدودكان
رده دا لعب عيال|..
تعيش انت ووجدى وياخد غيرها..

مياسي يقول...

ههههههههه حلوه جد

والأحلى مرة صاحبك

الصحيح ست رايقه عالآخر وروحها رياضيه جد :)

كل عام وانت بخير صح

Che يقول...

بطوطه
تخيلى انتى ضحكتى من القرايه بس ... امال انا اللى عايشت المشروع اعمل ايه ... كويس انك قلتى انه كان من احلامك و خلاص نسيتيه ... كنتى بتطبطبى عليهم و تألكليهم بأيدك و برضه ماتوا ... يا حرااام
و بعدين انا معرفش لغايه دلوقتى هما بياكلوا ايه اصلا .. بس انتى قصدك ان بطنهم مشيت من ورق الخس فماتوا ولا ايه
منورانى يا بطوطه

Che يقول...

زهور
كان تقريبا وجدى آخر واحد بيربى دود القز ده و بعديه بطلوا تقريبا او كان هو وشه وحش على الدود اللى فى البلد ... بس لو بتربى صراصير انا ممكن افيدك بخبرتى ... امال انا خريج قسم حشرات كده .. منظر يعنى
و انا مستحمل وجدى لان ايمان المرء لا يكمل الا بأيمانه بالقضاء و القدر
و متخافيش .. هبقى اسلملك عليه
منورانى يا زهور

Che يقول...

شوشو
ابقى اسيب مسافات ازاى بس يا شوشو ... هو انا بكتب على ورقه كراسه ... و يا ستى المره الجايه هكبر الفونت عشان النظر
منورانى يا شوشو

Che يقول...

سهيل
والله يا عم مش انا اللى بقول .. ده وجدى ... و انا متأكد انه دلوقتى اقتنع بكلام الدكتور بتاعك من غير ما يشوفه ولا يسمعه .. انما قلب المؤمن دليله
و انا عايش و وجدى عمال بياخد غيرها طبعا
نورتنى يا سهيل

Che يقول...

مياسى
ازيك يا قمر مش باينه ليه .. طيب الاول كنا بنقول مش فاضيه ... دلوقتى بتعملى ايه ... اوعى تكونى لسه بتجلى
شكرا على رأيك فى البوست المتواضع و يا فندم نحن فى الخدمه .... و طبعا مره صاحبى رايقه و فايقه و عايقه كمان .. هههه
و انتى طيبه يا قمر و دايما تكونى فى خير و صحه كده
منوارنى على طول يا مياسى

عاشقه وغلبانه يقول...

انا مش مستغربه وجدي قد مامستغربه مراته
ازاي تتسمح بحاجه زي دي في بيتها
ناس رايقه والله

تعالي عندي وشارك معنا في اخر بوست ياعمرو

سارة نجاتى يقول...

و الله دمك خفيف جدا يا عمرو

و البوست بتاعك فك عنى كتير

هو وجدى دلوقتى بيشتغل ايه و لا بيعمل ايه فى دنيته؟؟

Che يقول...

سارة
انتى مختفيه يا بنتى
الحمدلله ان البوست بتاعى فك عنك شويه و انك و متشكر لمجاملتك يا جميل
بالنسبه لوجدى آخر حاجه عرفتها عنه انه شغال فى مصنع بتاع موااسير صلب او حاجه زى كده
نورتينى يا سارة

اقصوصه يقول...

كل عام وانتم بخير

تمنياتي بقضاء عيد سعيد

Che يقول...

اقصوصه
و انتى بالف خير و الف سلامه
شكرا لتعليقك الجميل
نورتينى يا اقصوصه

donya يقول...

مساء الخير
صحبك ده عامل زي توم وجيري بيخبطوا في بعض ويتهرسوا ويقوموا من جديد

بجد انا بحسده انه عنده امل انه كل مره يبتدي من جديد
تحياتي

Che يقول...

دنيا
صاحبى ده عنده قدره عجيبه على التفاؤل انا معرفش جايبها منين ... و حقيقه مش عارف اذا كان بطل المرض ده ولا لسه
نورتينى يا دنيا و اتمنى اشوف تعليقاتك تانى